Menu

El voceru del grupu parllamentariu de Convocatoria por Asturies diz que'l Plenu Estraordinariu impulsáu por PP y Foru ye una "estratexa de ruiu" y recuerda qu'esiste un alcuerdu asturianu sobro financiamientu de les fuerces democrátiques de 2020, ratificáu en 2024 polos voceros

La celebración d'un Plenu Estraordinariu impulsáu por PP y Foru namás tien por oxetu foliar al gobiernu central en tolos ámbitos, más porque n'Asturies yá esiste un alcuerdu de toles fuerces democrátiques, robláu en 2020 y ratificáu en 2024 polos voceres, en defensa d'un modelu financieru para la Comunidá Autónoma. El voceru parllamentariu de Convocatoria por Asturies, Xabel Vegas, aseguró güei qu'esta sesión plenaria namás forma parte de la estratexa" de les dereches de "añedir más ruiu al ruiu esistente, nesti casu con un asuntu tan importante pa los servicios públicos asturianos como ye'l financiamientu autonómicu y el modelu de repartida de recursos ente les comunidaes autónomes".

Vegas recordó que yá esiste un alcuerdu ente toles fuerces polítiques, democrátiques y pluralistes d'Asturies, robláu en 2020 sobro un modelu de financiamientu que fuera xusto, que dexara la suficiencia financiera y que dexara encarar el costu real de los servicios públicos. Por eso, añedió, "el Partíu Popular sabe perfectamente que la reforma del modelu de financiamientu tien que pasar pol Conseyu de Política Fiscal y Financiera y, a lo postrero pol Congresu de los Diputaos. Asina que esto ye a cencielles xuna estratexa d'añedir más ruiu y tratar de foliar al gobiernu central con un asuntu tan esencial pa toos como'l financiamientu autonómicu que nun debería de ser un arma política pa mayor gloria de la derecha y de la estrema derecha".