Menu

Ovidio Zapico esixe la espulsión d'Israel y anima a cavilgar sobro cooperación institucional con La Vuelta Ciclista mientres participe

Ana Andrés denuncia l'usu del deporte como preséu de blanquéu del sionismu y anima a la ciudadanía sumase a les movilizaciones con banderes, pancartes y cufiyas

El coordinador xeneral d'Izquierda Xunida d'Asturies, Ovidio Zapico, anunció la convocatoria de movilizaciones pacífiques a lo llargo del percorríu asturianu de la Vuelta Ciclista a España pa esixir la espulsión inmediata” del equipu Israel PremierTech. “Homes y muyeres d'IX enarbolarán banderes de palestina desque, n'apenes dos hores, los ciclistes entren por Colombres nel conceyu de Ribedeva hasta que'l domingu salgan por Los Oscos”.  La formación denuncia que la so participación respuende a una campaña propagandística israelina para despintalos crímenes que ta cometiendo contra'l pueblu palestín, no que yá ye un “esterminiu debidamente planiáu pol gobiernu de la ultraderecha d'Israel contra'l pueblu palestín·.

N'Asturies, señaló Zapico, Izquierda Xunida “comprometese a poner tola carne nel asador pa dar continuidá a eses movilizaciones qu'han de ser pacífiques y qu'han de ser masives para esixir la inmediata espulsión d'esti equipu. Esti equipu ye una ferramienta de blanquéu, un embaxador del xenocidiu". 

Pa Zapico, la presencia del equipu israelín na prueba ye “una ferramienta de propaganda d'un Estáu que viola sistemáticamente los derechos humanos”. La participación, topeta con otres ediciones de La Vuelta, na que, recordó, espulsose al equipu rusu Gazprom, polo que denunció'l doble rasero y reclamó el mesmu tratamientu con Israel, que sigue desoyendo los mandatos de la ONU, con una masacre de la población civil. “Lo que ta pasando en Gaza, que ye un esterminiu, que nun tien xustificación nenguna, enllaza con una de les responsabilidaes que tenemos nel Gobiernu d'Asturies y que yo como Conseyeru tengo, y ye la Memoria Democrática: ¿Daquién imaxina una prueba deportiva no peor de los años 40 del sieglu pasáu cuando diben comboyes llenos escontra los campos de concentración nazis con un equipu ciclista nazi corriendo?”, preguntóse.

Por eso, esixó que la mesma organización de La Vuelta, la Unión Ciclista Internacional y el Conseyu Cimeru de Deportes tienen que dar yá la instrucción pa la “inmediata espulsión d'Israel de la Vuelta Ciclista”.

Sía que non, Zapico pidió al propiu Gobiernu d'Asturies una “reflexón” sobro cual hai de ser el futuru de la cooperación institucional con La Vuelta Ciclista si persiste nesta actitú de caltener al equipu d'Israel na prueba: “eso va esixir una revisión total, dende la collaboración económica hasta la presencia na mesma”. Ello ye que señaló que, al so xuiciu, naide del Conseyu de Gobiernu tendría de tar nos próximos díes n'actos oficiales de La Vuelta.

La espulsión ye más qu'un símbolu porque sería'l primer pasu pa un aislamientu efectivu d'Israel nel contestu internacional, siendo por tantu La Vuelta un finxu que, probablemente, bastiara otres actuaciones similares.
 

Apartheid israelín

Pela so parte, la responsable de Solidaridá Internacional de IX Asturies, Ana Andrés Ablanedo, denunció l'usu del deporte como un preséu de blanquéu del sionismu y del “apartheid israelín” y animó a la ciudadanía asturiana a amosar el so refugu con banderes, pancartes y cufiyes nos puntos del percorríu onde se convocaron manifestaciones que, enfatizó Ovidio Zapico, van ser “pacífiques”

Les movilizaciones empiecen güei vienres en Colombres y van siguir en Llanes, Les Arriondes, Nava, L.lena, Teberga, Avilés, A Veiga y otros puntos polos que va escurrir la prueba deportiva.

“Sabemos  que nun esiste mayor barbarie rexistrada d'aniquilación humana dende la II Guerra Mundial”, denunció Andrés, de la que reprochó que se siga cooperando na estratexa d'ablancazamientu israelín”. Ello ye que La Vuelta, dada la so visibilidá ya impactu mediáticu y social, supon un elementu clave nesa estratexa propagandística de tapecimientu de los crímenes contra la humanidá d'Israel al traviés del “sportswashing”.