Menu

El pactu inclúi amás impulsar una Llei d'Universidaes qu'asitie a la Universidá d'Uviéu como "pieza central" de la educación cimera

La Comisión Colexada de Izquierda Xunida Asturies, axuntada esta tarde, ratificó formalmente l'alcuerdu alcanzáu ayeri cola FSA-PSOE, pa suspender la llegada de nuevos centros adscritos o universidaes privaes y empezar a trabayar nuna llei autonómica d'universidaes qu'asitie a la Universidá d'Uviéu como exa del sistema d'educación cimera n'Asturies.

L'órganu de dirección d'IX respondió por asina'l pactu alcanzáu nel alcuentru calteníu por delegaciones de dambos partíos, que tuvieron encabezaes pol coordinador xeneral, Ovidio Zapico, y pol secretariu xeneral de la FSA, Adrián Barbón. “L'órganu decidió ratificar l'alcuerdu qu'ayeri la delegación d'izquierda xunida algamaba col presidente y la so delegación”, esplicó Zapico al términu de la xunta.

“L'alcuerdu encóntase básicamente en dos cuestiones: la primera, la suspensión de la llegada a Asturies de más centros adscritos o universidaes privaes dientro de les posibilidaes qu'ufierta l'ordenamientu xurídicu. Y de segundes, l'alcuerdu políticu de ponenos a trabayar yá nun proyectu de llei d'universidá p'Asturies que ponga nel centru de la nuesa atención, del nuesu esfuerzu y de la nuesa prioridá a la Universidá d'Uviéu”, señaló'l coordinador xeneral de IU Asturies.

Zapico sorrayó que se trata d'un entendimientu políticu que refuerza'l modelu d'universidá pública nel Principáu. “Un alcuerdu, poro, que blinde la universidá pública n'Asturies frente a otros modelos que, evidentemente, nun son el d'esta fuerza político”.

Mientres la xunta tamién s'encetó'l contestu político y económico nel que se produz la decisión. Según esplicó'l dirixente d'IX, l'alderique internu foi “interesante” y tuvo en cuenta factores más amplios que la cuestión universitaria. “Más allá de la decisión inmediata sobre la universidá privada, sobre los centros adscritos, tuvo tamién en cuenta tou el contestu que tenemos agora mesmu, el contestu internacional, marcáu pola nuevu guerra illegal qu'Estaos Xuníos ya Israel tán llevando a cabu”.

Zapico añedió que la organización cavilgó tamién sobre “les consecuencies económiques qu'esa guerra, xunida a la especulación, ta xenerando yá en productos básicos como puedan ser los combustibles y les repercusiones que va tener de manera inmediata pa la clase trabayadora y pa la mayoría social d'Asturies y d'España”.

El coordinador xeneral de IU Asturies indicó que na reflexón del órganu tamién pesaron les posibles consecuencies polítiques d'una rotura del actual Executivu autonómicu. “Tamién, evidentemente, un alderique marcáu poles consecuencies que tendría una eventual rotura de gobiernu n'Asturies que tendría, ensin dulda, un treslláu a los compañeros de Castiella y Llión que se tán xugando la so presencia nes Cortes de Valladolid el próximu domingu o pal nuesu propiu coordinador federal nel marcu de les elecciones andaluces”.

Nesi sentíu, defendió la continuidá de los gobiernos progresistes como ferramienta pa frenar retrocesos en derechos. “Tou eso, evidentemente, sopesar y encetar de manera conxunta y, sobremanera, que pa frenar la involución nun hai meyor receta qu'estos gobiernos progresistes como que tenemos n'Asturies, qu'avanzamos en derechos, como esta mesma selmana vimos cola llei LGTBI”.

Y ye qu'esa capacidá pa entendese pola izquierda, señaló Zapico, "tien que siguir siendo la receta pa los próximos cuatro años y que nun paez, poro, fayadizu romper gobiernos nel 26 pa construyir mayoríes sociales nel 27”.

Sía que non, Ovidio Zapico amosóse satisfechu d'un alcuerdu que, esplicó. "establez esta regulación de la que tamos falando, futura regulación, pero, sobremanera, suspender la posibilidá de que n'Asturies sigan llegando centros adscritos, que me paez una victoria importante”.