Menu

El voceru de Convocatoria por Asturies sorraya la meyora de los trabayos na Comisión parlamentaria sobro l'accidente,coles mires de consiguir el mayor consensu técnicu y políticu

Los grupos de la Xunta Xeneral avancen a bon ritmu nel alderique de les aportaciones al borrador del dictame de la comisión d'investigación, coles mires de blindar el documentu final énte posibles recursos. El voceru de Convocatoria por Asturies, Xabel Vegues, valoró de forma positiva'l clima d'entendimientu mayoritariu ente les fuerces polítiques democráticas p'apolazar el testu, magar reconocer les discrepancies de Grupu Socialista col restu de formaciones al respective de l'actuación de los responsables de Mines.

La comisión d'investigación encara agora la fase definitiva de los sos trabayos col entamu del estudiu ya incorporación de les enmiendes al borrador. Xabel Vegues esplicó que yá s'empezó esi trabayu no que calificó como xuna dinámica "bastante positiva, con bastante sintonía ente los grupos parlamentarios pa dir ameyorando esi testu, por que quede un testu lo más pulío posible". Nesti sentíu, apuntó que los llabores parlamentarios tán desenvolviéndose con axilidá: "Tamos diendo amás abondo rápido, les aportaciones que se valoraron en primer llugar fueron les nueses y yo creo que la resultancia ye bien positivu y hai sintonía ente los grupos parlamentarios".

El voceru de Convocatoria por Asturies nun resalvó qu'esisten puntos de diverxencia nel analís de la xestión alministrativa, centraos nel papel de la conseyería competente. Al respeutu, constató que "hai les diferencies lóxiques que toos conocéis ente'l Grupu Parlamentariu Socialista y el restu de los grupos parlamentarios sobro la valoración de l'actitú del Serviciu de Mines y de la Dirección Xeneral de Mines sobro esti accidente". A pesar d'este disenso concretu, Vegues aportunó en que "lo qu'hai ye xuna bona sintonía ente los grupos pa intentar apolazar lo que puede apolazase del borrador del dictame y por que quede lo meyor posible".

Garantíes llegales énte les responsabilidaes

Preguntáu poles alvertencies de los servicios xurídicos de la cámara sobro la inclusión de menciones esplícites a persones nel apartáu de responsabilidaes, el diputáu esclarió que la comisión inda nun encetó esi puntu del documentu. "Nun lleguemos a esa parte, ye ciertu que'l lletráu del pasáu miércoles fíxonos xuna esposición bastante detallada de la xurisprudencia del Tribunal Constitucional sobro les comisiones d'investigación", matizó.

La prioridá de los grupos, según treslladó'l voceru, pasa por dotar al dictame d'una sólida seguridá xurídica ensin qu'ello amenorgue la capacidá de fiscalización de los diputaos. "Tamos intentando ser lo más rigorosos posible por llograr un documentu que tenga rigor xurídico y que nun pueda ser oxetu de recursu d'amparu", manifestó Vegues, quien concluyó remarcando l'autonomía del órganu parlamentariu: "Pero sía que non tamién nos sentimos llibres como comisión d'investigación pa incluyir lo que consideramos oportunu".