Menu

Tamos viendo como se tan destruyendo les cuenques mineres y tenemos que salvar esa fonte d'enerxía propia que tenemos

La candidata de IU Asturies al Parlamentu Européu, Ángela Vallina, fixo esta tarde en L'Entregu  una defensa del sector de la minería del carbón como sector estratéxicu, coles mires de garantizar el so futuru y el de les cuenques mineres. Vallina aseguró que les polítiques neolliberales teníen nes Cuenques unu de los exemplos paradigmáticos nes sos resultancies, con un creciente cayente, non yá pol zarru de les mines sinón porque los proyectos de reactivación económica fueron fallíos. Esto esixe, al so xuiciu, revisar los alcuerdos alcanzaos por PSOE y PP n'España y que fueron la causa de l'actual situación.

"Creo que ye equí onde más se ven eses polítiques que se ordenen dende Europa, o más bien de quien lleva la batuta n'Europa, que ye Alemaña. Tamos viendo como se ta destruyendo les cuenques mineres y tenemos que salvar esa fonte d'enerxía propia que tenemos".

Pa Ángela Vallina, si nun se detienen les polítiques de retayos y si pon en marcha un plan de reindustrializacion, financiáu dende la mesma Unión Europea, nun va haber futuru.

Nun mitin en L'Entregu  la candidata d'IX Asturies, criticó con durez la falta de programes tantu de socialistes con verbenares que, añedió, dedicáronse tola campaña a facer un "teatrillo" pa confundir  a la ciudadanía, presentándose como fuerces antagonistes y despintando que, en realidá, tienen un mesmu oxetivu: caltener les polítiques de retayos y d'esmantelamientu del estáu del bienestar.

Frente a ello, Ángela Vallina fixo un llamamientu a movilizar el votu de toes aquelles persones que tean cansaes de palabres distintes ya iguales fechos: "nun somos lo que dicimos ser, sinón lo que faemos. Nesti país y n'Europa, PP y PSOE dicen que son alternatives distintes pero, na práctica, voten una y otra vez xuntos en contra de los intereses de la mayoría,  de la qu'aprueben midíes que namá favorecen al gran capital, a los bancos, a los conglomeraos económicos. N'España, les socesives reformes llaborales son un exemplu claru de que van pola mesma sienda como tamién lo demostraron na reforma del artículu 135 de la Constitución Española, pa supeditar al pagu de la delda cualesquier otra necesidá de la ciudadanía. Y en Bruxeles, igual: ellí votaron xuntos, socialdemócrates y conservadores en más del 70 per cientu de los asuntos que se llevaron a la Eurocámara, incluyíos el fin d'ayudes a la minería o les decisiones que suponíen retayos n'España".

La sanidá, la educación, el sistema de pensiones, tán en xuegu, afirmó Vallina, y el modelu va depender en gran midida de la correlación de fuerces: "conservadores y socialdemócrates yá sabemos lo qu'ufierten: privatizaciones, retayos, menos derechos. El 25 de mayu, síamos o non conscientes, tamos xugando cuestiones d'equí, pero que se van a decidir n'Europa".