Menu

Les bones intenciones de la Conseyera tienen que concretase.

Aurelio Martín, voceru parlamentariu d'IX na Xunta Xeneral, xuntu colos diputaos Marta Pulgar y Luis Álvarez Payo, y el conceyal de Siero, Nicolás Fernández y otros miembros de la organización, allegaron a amosar el “total sofitu y solidaridá” a los trabayadores del mataderu central d'Asturies, en Noreña. Dempués del alcuentru, el voceru parlamentariu, pidió al executivu asturianu que pase les esmoliciones” qu'asegura tener la Conseyera de Agroganadería “a les acciones”. Nesti sentíu, Martín, aseguró que'l  mataderu central tien un papel estratéxicu nel sector cárnico, nel sector ganaderu, pero como tal ye una industria, como munches otres asitiaes na zona. Al so xuiciu, non  solo basten bones palabres de la Conseyera d´Agroganadería, sinón que'l Conseyeru d'Economía y Facienda tien de tomar cartes nel asuntu, recibir a los trabayadores y abrir una negociación cola dirección de la empresa a efectos de qu'esta pueda caltener la so actividá y el so nivel d'emplegu.

“Creemos imprescindible que'l  Conseyeru d'Economía y Emplegu axunte col comité d'empresa. Les bones intenciones de la Conseyera tienen  que concretase, y sobremanera tien que concretase col Conseyeru d'Economía abriendo una negociación cola dirección d'a la empresa a efectos de qu'esta pueda caltener la so actividá y l'empléu”, aseguró a les puertes de la empresa. Martín esplicó que nun puede ser que'l Conseyeru presente nel parlamentu una estratexa de Política Industrial  p'Asturies y que “coles mesmes una parte de les nueses industria un día sí y otru tamién se tean  cerrando”. El mataderu tien 94 puestos de trabayu directos y otros 40 indirectos  y xuega un papel importante nesta zona y nel conxuntu d'Asturies, aseguró Martín. “Ye necesario parar esta sangría de puestos de trabayu”, alvirtió.

D'últimes punxo a disposición de los trabayadores l'actividá del grupu parlamentariu d'IX na Xunta Xeneral pa que puedan presentar iniciatives en defensa de los sos emplegos.