Menu

El voceru d'IX oldea les palabres pasaes colos fechos presentes

Considera non cumplíes les grandes prioridaes fites nel discursu d'investidura: la crisis y el fomentu del empleu

Alvierte de la xestión gravemente deficiente de les polítiques sociales y del palmario “incumplimientu” de los sos compromisos de rexeneración democrática

Aurelio Martín, voceru parlamentariu d'IX na Xunta Xeneral, dexó n'evidencia los incumplimientos” de la llexislatura de Javier Fernández al mandu de la presidencia de la comunidá autónoma. Nel  discursu del Alderique d'Orientación Política de 2014, Martín oldeó les palabres pasaes del Presidente colos fechos presentes tantu en política económica como na social o educativa, amás de les referentes a les propuestes de rexeneración institucional.

Martín recordó nun primer momentu'l discursu de investidura y les grandes prioridaes mentaes nel mesmu: la crisis y el fomentu del empegu. A xuiciu del voceru d'IX les cifres de paru son prácticamente les mesmes güei qu'al entamu de la llexislatura. “Casi 100.000 persones con nome y apellíos”, aseguró pa referise a que “nun avancemos un ápice en materia d'empléu y de desenvolvimientu económicu” y, amás, baxó la tasa d'ocupación, asitiándose diez punto per debaxo a la media estatal. “Nun foi capaz de cumplir el primera y más importante oxetivu que s'impunxo logar cuando solicitó'l nuesu votu pal so investidura”, alvirtió.

El voceru d'IX tamién preguntó de forma retórica qué midíes tomó en defensa de les empreses asturianes en crisis, o por casu en defensa de los trabayadores despidíos de General Dynamics o de Suzuky o pa evitar el zarru de Mieres-Tubos. De la mesma, entrugó-y pol impulsu a la Estratexa de Política Industrial o pola tarifa eléctrica que los sos cambeos perxudiquen a la industria asturiano mientres beneficia a otres comunidaes como'l País Vascu.

Nel capítulu d'infraestructures básiques, Martín denunció'l ritmu desesperadamente lentu d'aquelles que tán en marcha, les  duldes ensin estremar sobre los plazos d'execución, casu de l'AVE, o la cancelación  de dalgunes como l'autopista del mar.   “¿Qué iniciatives polítiques va impulsar pa defender los intereses de la nuesa comunidá nesti asuntu?”, esquizó Martín. Nun escaeció'l voceru l'ausencia d'una estratexa global de sofitu a los autónomos y entamadores o l'arrenunciu a la tramitación d'una llei de sofitu a el entamadores comprometida.

Especial relevancia otorgó nel so discursu Aurelio Martín a la situación de la sanidá, la educación y los servicios sociales sobre los que'l Presidente aseguró que “empiorar la so calidá yera'l peor esbardie que podía cometese”. “Tamién equí vemos la distancia ente'l dichu y el fechu”, reprochó-y Martín antes de citar les llistes d'espera quirúrxiques “esbocaes”, el cambéu del modelu d'atención de salú mental o la situación del Hospital Central d'Asturies, onde aseguró que'l marxe qu'IX concedió ante'l treslláu “ta escosu• y los problemes denunciaos polos profesionales y usuarios siguen ensin resolvese. Nesti apartáu sanitariu calificó como de “soberbia y prepotencia” l'actuación de los responsables políticos de la Conseyería, “empezando pol so titular”.

“La xestión del so gobiernu en polítiques sociales ye gravemente deficiente”, esplicó'l voceru d'IX empezando pola xestión del salariu social, la mala xestión del YERA, la relación de la conseyería col tercer sector, “motivu de conflictu permanente”, el despidu de los valoradores de la dependencia, que va suponer “llana y cenciellamente la paralización definitiva de la llei de dependencia, la so puntilla”.

N'educación sorrayó la creciente precariedá llaboral y l'amortización de places de profesoráu, anque nun escaeció la incidencia del “nefastu ministru Wert” na educación del país coles sos polítiques de austericidio. Na llista d'incumplimientos citó la llei de la universidá asturiana o la falta de protagonismu de la Universidá nel desenvolvimientu del Plan de Ciencia, Tecnoloxía ya Innovación, centráu nel so mayor parte nes empreses.

El voceru d'IX fixo referencia tamién a la nula meyora na xestión de borrafes o nel ámbitu rural, onde sorrayó que “parte fundamental del so programa no referente a los programes nun cumplió nengunu” y nun pudo sacar alantre prácticamente nenguna de les propuestes qu'Asturies plantegaba na aplicación de la PAC.

Nel capítulu de propuestes de rexeneración democrática, Martín referenció la so “palmario incumplimientu” atribuyendo la responsabilidá namá a Javier Fernández y la so ausente capacidá de diálogu y negociación. Nes lleis de Bon Gobiernu y Tresparencia, nel cambéu de la llei electoral y nel cambéu del votu nel alderique de investidura, “nos trés asuntos mintiónos, a nós y al conxuntu de los ciudadanos d'Asturies”, denunció Martín una vegada más.

Na última parte de la so intervención, Martín demandó respuestes y garantíes de que nun vuelva asoceder, en referencia al denomináu Caso Villa. Nesti sentíu llamentó perder la ocasión d'introducir midíes de rexeneración política y democrática como proponía IX na Llei de reforma electoral como na del Presidente, anque espresó'l deséu de que'l gobiernu nun actúe con igual cerrazón nes lleis de Bon Gobiernu y Tresparencia”. Nesti sentíu anunció qu'IX va pidir na negociación presupuestaria reforzar los servicios d'inspección tributaria del Principáu y va faer la mesma propuesta nel ámbitu estatal nos que-y son de la so competencia.