Menu

Los grupos parlamentarios d'IX, UPYD y Foro Asturies van presentar una enmienda conxunta al presupuestu de dos millones d'euros destinada a la modernización d'esplotaciones agraries pa dotar económicamente la partida pola que quedaron fora más de 240 ganaderos asturianos.

Los voceros de los trés grupos, Aurelio Martín, Ignacio Priendes y Cristina Coto, ufiertaron esta mañana una rueda de prensa xuntu al representante de la Plataforma por un Futuru nel Campu, Emilio González. Na mesma, los trés amosaron el sofitu a estos ganaderos que por falta de presupuestu quedaron ensin les ayudes per segundu añu consecutivu, en munchos casos, cola inversión yá realizada.

Emilio González pidió que'l partíu del Gobiernu, el PSOE, y el PP, que sofita'l presupuestu, rectifiquen y cavilguen sobre estos “nocivos” retayos pal sector y pal texíu económico principal de la rexón, “que ye'l agroalimentario”. De la mesma, alvirtió qu'estos retayos de los presupuestos que traen la denegación de más de 240 planes de meyora van suponer el zarru de munches esplotaciones y van poner en peligru la supervivencia de prácticamente toes na rexón, máxime cuando nes comunidaes vecines “hai un apueste claro y decidío pol sector agrariu nes que s'amonten considerablemente los sos presupuestos”. Al so xuiciu, esti retayu produzse, amás nun momentu delicao y crucial” una y bones el próximu añu van sumir les cuotes lácteas y los precios van ser entá más agresivos.

Aurelio Martín, voceru d'IX, sorrayó que daqué se ta faciendo mal nesta comunidá autónoma si nun somos capaces de dar respuesta a les demandes d'estos 240 ganaderos. “Difícilmente vamos poder siguir falando d'entamadores, d'empléu y de caltenimientu de la población nel mediu rural si nun somos capaces de cuando hai 240 esplotaciones , pequenes empreses familiares, de solucionalo y  dámos-yos un portada nes ñarices”, alvirtió. Martín cuntó que'l Gobiernu puede sacar estos dos millones d'euros de la partida d'imprevistos onde figuren ocho millones d'euros pa 2015 y prever el gastu pa 2016. “Demandamos que'l Gobiernu mueva ficha y esperamos qu'antes del 29, el Gobiernu colos afectaos, llegaren a un alcuerdu”, esplicó'l voceru d'IX.

Cristina Coto, voceru de Foro Asturies, aseguró qu'esti pidimientu de la Plataforma por un Futuru nel Campu ye “absolutamente sensata y humilde” y l'iniciativa de respuesta a una inxusticia” nun momentu en que s'acurren sobre'l campu asturiano “solombres bien escures”,

Ignacio Priendes, voceru d'UPYD, pela so parte consideró que los planteamientos d'estos ganaderos resulten “bien sensatos” y que los sos planteamientos son conscientes de que'l futuru nel campu pasa por apostar pola modernización nun sector onde les riegles tán camudando.