Ana Castaño anuncia que la propuesta inclúi la Variante de Payares la supresión del peaxe del Güerna y más recursos pa infraestructures y patrimoniu. La diputada d'IX per Asturies critica a Montoro por unes cuentes claramente electoralistes
Izquierda Xunida d'Asturies va presentar güei mesmu 42 enmiendes per valor de 475 millones d'euros al Presupuestu Xeneral del Estáu (PXE), cifra qu'inclúi intervenciones en comunicaciones, seguridá vial, caltenimientu y valorización del patrimoniu cultural ya industrial, mediu ambiente y el pagu a la Comunidá de los 213 millones d'euros que debe en conceutu de fondos mineros l'Estáu y de los que'l so montu foi reconocíu en sentencia xudicial.
La diputada d'IX per Asturies, Ana Castaño, xustificó la necesidá d'estes enmiendes na falta de sensibilidá del gobiernu del PP pa con Asturies y que, dixo, non solo se constata nestos presupuestos sinón nos ellaboraos desque Mariano Rajoy aportó a la Moncloa. Les cuentes pa 2016, señaló Castaño, nun se realizaron dende la perspectiva de dar respuesta real a les necesidaes de la ciudadanía sinón en clave puramente propagandística. A xuiciu de la diputada, el ministru de Facienda convirtió los Presupuestos Xenerales del Estáu nun elementu más de la campaña electoral qu'empezó nes autonómiques y municipales y que, dixo, el PP caltién abierta y claramente empobinada a los próximos comicios xenerales. “Ye una actuación más dientro d'esta campaña del PP, empeñáu en convencenos de daqué que la realidá, de manera machacona, desmiénte-y, que ye qu'esti país ta saliendo de la crisis y ta progresando”. Namái llueñe de la realidá, esplicó la parlamentaria quien contrapuso a esi llinguaxe trunfalista les más de 700.000 families que, a día de güei, nun tienen nengún tipu d'ingresu n'España.
No referío a les enmiendes, Izquierda xunida plantega la supresión del peaxe del Güerna (5 millones d'euros), una reclamación, señaló Castaño, largamente demandada pola sociedá asturiana y que tendría influencia nuna mayor competitividá pal sector granible asturianu. Nun ye la única no tocante a les comunicaciones y, una vegada más, foi necesariu reclamar más presupuestu pa la Variante Ferroviaria de Payares pala que se piden 35 millones adicionales. Y ye que, no referío a la nueva comunicación por ferrocarril, los retrasos de décades paez qu'inda nun llegaron al so fin. Ello ye que esplicó la diputada, el Gobiernu Rajoy sigue ensin esclariar la fecha na que, entá a medies, va entrar en serviciu esta nueva infraestructura.
Ente les grandes cifres d'inversión, inclúyense 12 millones pal Plan de Víes de Xixón; 6 millones pal cambéu de la estación de Renfe y Feve d'Avilés, en llínea cola denominada “nueva centralidá”; 2 millones p'accesos al corredor del Nalón y una partida de 1,75 millones pa la “Y” de Bimenes.
Específicamente pa la meyora del tresporte de viaxeros nes cercaníes de ferrocarril, inclúyense 8 enmiendes que la so inversión xubiría a 19,7 millones d'euros. Nesti casu, prevese impulsar les cercaníes d'Asturies, l'alquisición de nueves unidaes de tren, la instalación d'un apeaderu pa dar serviciu al Hospital Central d'Asturies n'Uviéu, o una nueva estación en La Pola L.lena. Esti esfuerzu xustificar pola necesidá d'ameyorar les comunicaciones interiores d'Asturies con un apueste claru, esplicó Castañal, poles de cercanía.
Más de 9 millones pa patrimoniu cultural, industrial y llingua
La debilidá de los conseñamientos del Presupuestu Xeneral del Estáu pa la valorización del patrimoniu cultural ya industrial d'Asturies, según pal impulsu de la llingua obligó a IX a presentar tamién enmiendes per valor de más de 9 millones d'euros, qu'inclúin, ente otres, acciones nel prerrománicu asturianu (1 millón), acciones pa la ilesia y monesteriu de San Salvador de Cornellana (2 millones); y una partida específica de 147.000 euros pa l'Academia de la Llingua Asturiana.
Diputáu Autonómicu y Coordinador d'IX
Diputado Autonómico
(Mas Asturies)
Diputada Autonómica
Convocatoria por Asturies