Menu

La eurodiputada d'Izquierda Xunida Ángela Vallina denunció esti miércoles dende Bruxeles que la eliminación de les cuotes láctees, lo que va tener un gran impactu negativu nel sector asturianu, acompañáu de la industrialización de la ganadería y l'agricultura, “tán allanando el camín al Tratáu Tresatlánticu de Comerciu ya Inversiones (TTIP)” qu'axusten la Comisión Europea y EEXX, al dexar la entrada nel mercáu européu a les grandes multinacionales estadounidenses.

“Creo que se ta trabayando de cara a lo que nos vien enriba col TTIP. Ta trabayándose en favor de les grandes esplotaciones, de les producciones ensin controles sanitarios estrictos y tase forzando al pequeñu productor a la desapaición o a siguir solicitando creitos, aumentando les sos deldes”, afirmó Vallina mientres un descansu del Seminariu Internacional sobre'l sector lácteo entamáu esta selmana polos eurodiputaos del Grupu de la Esquierda Unitaria Europea (GUE/NGL) Lídia Senra (AGEe) y Josu Juaristi (Bildu).

Pa Vallina, “lo que fai falta d'una vegada, y asina lo dexó claro'l Sindicatu Llabriegu mientres les sos esposiciones, ye que se plantege una política pública que respuenda a los intereses de la xente y  que dexemos yá de trabayar pa les grandes multinacionales, que ye lo que traxo la industrialización de l'agricultura y la ganadería”.

La eurodiputada d'IX criticó qu'a lo que se tea tendiendo sía a la industrialización del sector, provocando afogar de la ganadería y l'agricultura a pequena escala. “Ta plantegándose tou a nivel industrial pal beneficiu de les grandes compañíes. Tamos falando de los piensos, de los trexénicos, de les grandes estensiones, qu'acaben cola agricultura y la ganadería convencional”, aportunó.

Vallina sollertó, amás, de les consecuencies nefastes” que tien esta política pal mediu rural “al acabar con una manera de vida tradicional, lo que se traduz en que se despueblen les zones rurales y que se-yos dea, por casu, otru enfoque”. Asina, la eurodiputada refirióse al casu de Castrillón, “onde antes yeren toa ganaderíes y agora tamos llenos de xalés que son usaos como segunda residencia”.

Juan José Menéndez García, ganaderu asturianu y representante de COAG Asturies, movióse a Bruxeles pa participar tamién nel seminariu internacional. Dende'l so puntu de vista, “lo que ta en xuegu ye'l modelu granible que queremos pa Europa, si queremos una Europa de les mercancíes o de les persones. Nós tenemos d'aportunar en qu'el nuesu modelu ye unu nel que los alimentos lleguen de forma saludable al consumidor, pero qu'amás esos alimentos cubran los costos de producción con unos precios algamadizos”. “N'Asturies –prosiguió- tenemos d'apostar por esto, por un modelu granible que sía sostenible col medioambiente”.

El representante de COAG refirióse tamién a la eliminación de les cuotes láctees, lo que “supon la lliberalización del mercáu” y que “trai que los grandes productores cómanse a los mozos, faciendo que les grandes industries sían les que rixan el mercáu”.

“A mayor ufierta, mayor demanda de mercancía pero a menor costu y lo que se ta plantegando ye que se faigan productos de baxa calidá coles mires puestes na esportación. El problema ye que nun se cubran los costos de producción, lo cual arruina entá más al productor porque va tener que producir más pa sobrevivir, dependiendo o bien de los bancos o d'otros sectores pa poder caltener les esplotaciones dignes y vidables”, alvirtió.