Menu

IX d'Asturies amuesa'l so total sofitu a les reivindicaciones de los trabayadores de Xixón Fabril y comprométese a favorecer la mediación col Principáu pa buscar solución a la empresa que da emplegu a 48 trabayadores.

Manuel González Orviz, coordinador d'IX d'Asturies, el so voceru parlamentariu, Gaspar Llamazares y el diputáu Ovidio Zapico, asina-y lo treslladaron a una representación de trabayadores colos que s'axuntaron esta mañana nel Parlamentu asturianu. Tamién comprometieron la so presencia na manifestación qu'esta tarde va percorrer les cais de Xixón en sofitu d'esti colectivu. A xuiciu de Manuel González Orviz la empresa tantu tecnolóxicamente como dende'l puntu de vista del mercáu y financieru ye vidable y tase atopando con problemes de deslocalización. Según Orviz el Principáu tien de mediar con Verallia-Saint Gobain pa que nun se siga perdiendo actividá en Xixón.

Pela so parte, José Luis García, responsable d'acción sindical de CCOO d'Industria, que realizó los llabores de voceru de los trabayadores, aportunó na necesidá de buscar sofitu de tolos grupos pa llograr una alternativa al zarru de Xixón Fabril, nestos momentos en concursu d'acreedores y en fase de lliquidación. "Nun ye un problema de mercáu nin financieru, sinón de deslocalización de l'actividá granible d'Asturies escontra Cataluña", aportunó,  de la qu'animó a que la d'esta tarde sía una manifestacion masiva.