Ángela Vallina y Paloma López axunten en Ámsterdam con conceyales, sindicatos y trabayadores del tresporte y del sector marítimu
La eurodiputada asturiana criticó les polítiques d'austeridá que tán recayendo sobre les capes más vulnerables de la sociedá
Les eurodiputaes d'Izquierda Xunida Paloma López y Ángela Vallina axuntáronse ayeri en Ámsterdam con diversos representantes locales del sindicatu FNV, trabayadores del sector marítimu y del tresporte per carretera, nel marcu d'unes xornaes d'estudiu entamaes esta selmana pol Grupu de la Izquierda Unitaria Europea - Izquierda Verde Nórdica.
Nos alcuentros, dambes parllamentaries pudieron tratar temes como l'accesu a la vivienda, l'acoyida de refuxaos, la precarización de les condiciones de trabayu y la situación de los estibadores y tresportistes, problemátiques toes elles con clara relevancia en tola Unión Europea.
La primer xunta de la mañana tuvo a Ron Meyer como protagonista, actual presidente del SP (Partíu Socialista) y antiguu líder sindical. López allabó'l papel de les organizaciones sindicales “como interlocutores fundamentales” de los partíos d'izquierda “porque tenemos de ser la voz del movimientu obreru”.
La eurodiputada d'IX destacó la importancia “de reforzar la organización de los trabayadores y convertir lluches qu'a priori pueden paecer aisllaes les unes de les otres, en movilización popular”. Sobre los exemplos puestos por Meyer, López afirmó que “la esperiencia holandesa enséñanos la importancia de la organización pa que la izquierda sía auténticamente capilar, de baxo pa riba, apostando por construyir equipu, reforzar el so plan de trabayu y mandar un mensaxe claru”.
De siguío, les eurodiputaes tuvieron la ocasión d'escuchar los retos que s'atoparon los conceyales d'Amsterdam, Laurens Ivens y Arjan Vliegenthart, al respective de l'acoyida de refuxaos y les polítiques d'asilu, y la problemática en materia de vivienda que vive la capital holandesa.
Sobre la política de la UE coles persones abelugaes, Vallina punxo en valor la solidaridá y xestión de la rede de ciudaes d'acoyida creada nel Estáu español, como contrapuntu a la "insolidaridá y criminalización” que se fixo dende les instituciones europees. “Nes ciudaes de la UE hai medios, dineru y sobremanera voluntá ciudadana p'acoyer a les families de refuxaos. Namai fai falta que les fronteres de la Unión, cerraes ilexítimamente, sían abiertes en corredores humanitarios "pa dar pasu a la voluntá d'acoyida, solidaridá y asistencia qu'esiste na ciudadanía”, aseguró.
Per otru llau, en cuanto al derechu a una vivienda digna, “un derechu universal”, Vallina llamentó que cada vez sía “más inalcanzable pa munchos ciudadanos, non yá nos países del Sur, sinón tamién nes zones más riques d'Europa, como Amsterdam”. Esta situación, siguió, “ye frutu de les polítiques d'austeridá qu'afueguen a los ciudadanos mientres favorecen los beneficios de los grandes bancos y empreses de patrimoniu inmobiliariu”, dexando pel camín cientos de miles de families desanunciaes”, y provocando “un aumentu tresmandáu del preciu de los arriendos” y la “proliferación de guetos nes grandes ciudaes”.
“Ye obligatoriu que dende la UE xenérense polítiques de vivienda pensando en persones y families, garantizando l'accesu universal, cuantimás a los más desfavorecidos. Dende IX trabayamos pa ello lluchando por consiguir más vivienda, más arriendos sociales y más protección contra los desahucios”, añedió.
A Ivens y Vliegenthart siguiólos Nieck Stam, secretariu xeneral del sindicatu FNV Puertos, quien espunxo los graves problemes qu'encaren el trabayadores del puertu de Rotterdam, una situación que para López ye “estensible al conxuntu de la UE”. “El puertu de Rotterdam ye un exemplu estremu de cómo la digitalización y la robótica son utilizaes p'aumentar la esplotación de el trabayadores”, dixo. “Esta ye una realidá que la Comisión tendrá d'encetar na so estratexa pa la Industria 4.0”.
N'afondando nos retos que representen pa el estibadores la internalización y l'automatización de la producción y la loxística, López abogó por “reforzar l'acción sindical” y “axustar alcuerdos sectoriales, nacionales y europeos” qu'eviten la competencia a la baxa ente puertos.
Coles mesmes, cavilgó sobre les condiciones llaborales de el trabayadores de los puertos, espuestos a enfermedaes y accidentes llaborales frecuentes, y esixó “que s'apliquen los reglamentos europeos”, anque ensin “una meyor inspección y ensin dar más voz a los sindicatos, tou va quedar en papel moyáu”, avisó.
A lo último, les eurodiputaes tuvieron la ocasión d'intercambiar puntos de vista con Edwin Atema, líder de la campaña Por un Tresporte Xustu en Países Baxos y representante tamién del sindicatu FNV. López, que trató bien de cerca la problemática del dumping social nel sector del tresporte na so actividá parlamentaria, alvirtió de que los problemes descritos por Atema “son comunes a toa Europa” y que los tresportistes, cuantimás los de carretera, viven “una nueva esclavitú pola falta d'aplicación de la normativa europea”.
La eurodiputada d'IX quixo treslladar asina tol so sofitu a la campaña de Fair Transport Europe y comprometióse a “siguir impulsando dende'l Parlamentu iniciatives pa poner frenu al dumping social”.
Diputáu Autonómicu y Coordinador d'IX
Diputado Autonómico
(Mas Asturies)
Diputada Autonómica
Convocatoria por Asturies