IX esixe estudiu d'impactu ambiental pal proyectu de prospecciones de fracking en 11 conceyos asturianos
Ramón Argüelles dio a conocer güei los allegamientos de la formación, que reclama, amás, la prohibición de la estracción de gas por aciu quebra hidráulica, polos riesgos pa la redolada d'esta técnica extractiva.
Izquierda Xunida va esixir un estudiu d'impactu ambiental ante la solicitú d'un estudiu sobre hidrocarburos en 11 conceyos d'Asturies, realizáu poles empreses Hunosa y volta, y nel que se contemplen técniques de quebra hidráulica (fracking), y la prohibición de llogru de gas natural por aciu d'esta técnica . El coordinador xeneral de la formación, Ramón Argüelles, dio a conocer güei los allegamientos presentaos pol so partíu y que van dexar a IX ser “parte interesada” nun procesu que, según la secretaria de política municipal d'IX, Gabriela Álvarez, prevese llargu.
Argüelles, Álvarez y el diputáu Ovidio Zapico ufiertaron esta mañana una rueda de prensa na que falaron les implicaciones d'esti estudiu, qu'afecta a 37.314 hectárees y 11 conceyos d'Asturies, de los que trés, Mieres, Llangréu y Siero, presentaron allegamientos propios. “Creemos qu'el frackig, nesti casu, ye una práctica que ye peligrosa pal medioambiente, porque contamina los acuíferos, porque puede estropiar la salú de les persones”, resaltó'l coordinador xeneral d'IX, quien señaló'l so alcuerdu con qu'Hunosa diversifique la so actividá, eso sí, siempres qu'haya'l máximu rigor nel cumplimientu de les midíes pa la protección del medioambiente.
Los allegamientos presentáronse ante la Conseyería d' Industria y Emplegu, que ye la qu'agora tien de resolver. La posibilidá de contaminación d'acuíferos soterraos que lleven apareyada estes técniques, los efectos sísmicos de les mesmes naquellos llugares onde s'efectúen, son, a xuiciu d'Argüelles d'entidá abonda como pa que'l Principáu adopte midíes.
Pa Gabriela Álvarez, el proyectu actual ye demasiáu “indefiníu”; lo que, añedió, riquiría un estudiu d'impactu ambiental más, esplicó, porque esti tipu de técniques extractives, dada la so relativa novedá nel contestu español y européu riquen d'un mayor precuru. “Creemos que ye un proyectu lo suficientemente importante como por que non pase desapercibíu, por qu'IX sía parte comenenciuda”, aprofió.
El diputáu Ovidio Zapico esplicó que la posición d'IX nun ye nueva y que, ello ye que yá na llexislatura pasada realizara delles iniciatives al respective de la quiebra hidráulica, siendo'l primer grupu parlamentariu en refugar el fracking, impulsando un resolvimientu nel que, prácticamente, por unanimidá (salvo l'únicu diputáu qu'entós tenía UPyD) y basándose nel principiu de prevención y precuru “, refugóse esta técnica. Sía que non, el parllamentariu pidió al Principáu tresparencia y precuru. “Habría que recorda-y al Gobiernu rexonal lo qu'el so grupu parlamentariu diz y vota na Xunta Xeneral, cuando yá en dos causes –en febreru de 2013 y tamién mientres esta llexislatura- la Cámara encetó asuntos rellacionaos col fracking”.
Diputáu Autonómicu y Coordinador d'IX
Diputado Autonómico
(Mas Asturies)
Diputada Autonómica
Convocatoria por Asturies