Menu

La eurodiputada d'IX carga contra la reforma local del PP por “retayar derechos fundamentales a los ciudadanos, afogar la capacidá de xestión de los equipos de gobiernu local y llindar les competencies de los conceyos”.

La eurodiputada d'Izquierda Xunida Ángela Vallina reivindicó ayeri'l papel y la importancia que tienen los conceyos pa presentase como alternativa a les polítiques de retayos de derechos sociales, llaborales y económicos de la Unión Europea. Mientres les xornaes de la Rede Europea de Representantes y Autoridaes locales Progresistes (Realpe, poles sos sigles en francés) entamaes pol Grupu de la Izquierda Unitaria / Izquierda Verde Nórdica (GUE/NGL) en Bruxeles, la exalcaldesa del Conceyu asturianu de Castrillón resaltó que frente “al modelu d'avaricia” de les instituciones comuñales y les sos polítiques económiques que tán semando Europa de “desigualdá, probeza y precariedá”, son los conceyos, les autoridaes locales, les instituciones que tienen una mayor “capacidá pa ufiertar soluciones” de forma axilosa” a los problemes que provoquen na sociedá diches polítiques comuñales.

“Güei vemos cómo na Unión Europea tán produciéndose cambeos que, llueñe de correxir les desigualdaes, tán amontando a gran escala y con rapidez. Los ricos tienen cada vez más poder, ente que les clases populares tán cada vez más esclavizaes y pierden l'accesu a servicios y derechos básicos”, apuntó.

Un modelu d'avaricia que, como esplicó Vallina, empón a una gran parte de la población europea al desemplegu y la precariedá”, y a la perda de derechos sociales y llaborales”, frutu de la desindustrialización, sobremanera nos países del Sur, y del treslláu de la producción a países onde la esplotación de trabayadores dexa a les grandes empreses llograr mayores beneficios.

Un exemplu d'esti empobrecimiento ye Asturies, “que foi víctima demientres los postreros 30 años d'una desindustrialización masiva, col consiguiente amenorgamientu d'actividá y emplegu”. Nel casu de la minería, señaló, “pasóse de 30.000 emplegos directos a menos de 3.000” y nel sector de la siderurxa, “de 24.000 directos a 7.000”. “Por si esto fuera poco –siguió- el 90% de los puestos de trabayu que se xeneren son de calter temporal”.

Sicasí, “Asturies nun ye un casu aislláu”, sinón “un exemplu concretu de lo que ta pasando en delles zones d'Europa”.

Vallina pasó asina a reclamar y reivindicar la importancia del municipalismu, “porque tien la potestá de solucionar en gran midida dalgunu d'estos problemes”. Dende'l so puntu de vista “ye la institución más cercana a la xente”, y poro, “la que más capacidá tien pa conocer de primera los problemes de les ciudadanes y ciudadanos y ufiertar soluciones”. Coles mesmes, “pol so tamañu, ye tamién la institución más axilosa na respuesta y la que más versatilidá apurre pa sumar distintes fuerces de la sociedá na busca d'alternatives y polítiques innovadores”.

La eurodiputada criticó que con too y con esto, los conceyos tán viéndose lastraos pola reforma de l'Alministración Local impuesta pol Gobiernu del Partíu Popular nel Estáu español, una llei que ta “retayando derechos fundamentales a los ciudadanos, afogando la capacidá de xestión de los equipos de gobiernu local y llindando competencies de les autoridaes locales”. “Ye un exemplu más ente otros munchos, qu'amuesen cómo les autoridaes estatales o comuñales  tríen los derechos fundamentales de los ciudadanos, en beneficiu d'unos pocos”, añedió.

Na so opinión, cuanto más grande ye la concentración de poder nes instituciones que tán más llueñe del ciudadanu”, mayores son les “prebendes” y más ensundioses son les puertes xiratories pa dellos dirixentes políticos”. Un pasu de responsables políticos y cargos públicos “escontra sectores privaos primeramente favorecíos por ellos nel so trabayu institucional”, que ye “unu de los grandes problemes y más escandalosos que tenemos güei n'España”.

“Frente a esti panorama desolador”, Vallina ve la xunta añal de Realpe, que sigue esti xueves, como un puntu d'alcuentru clave pa que “dirixentes d'izquierdes y representantes locales compartan esperiencies, conocencia ya idees, que dende'l municipalismu tán faciendo frente a estes polítiques”, con soluciones alternatives ya innovadores, lluchando contra'l desemplegu, la precariedá, la desindustrialización y fomentando los derechos sociales”.