La formación va presentar una iniciativa na Xunta pa aprobar un plan de choque y la constitución d'una axencia de desenvolvimientu que xestione tolos proyectos y recursos pa la reactivación
Izquierda xunida fixo esta mañana una convocatoria pola supervivencia de les cuenques mineres. Responsables de la organización nos distintos conceyos d'Asturies participaron nuna xunta en La Pola Llaviana col oxetivu de plantegar alternatives a la inacción de los gobiernos d'Asturies y d'España frente al declive de los antiguos territorios del carbón.
El coordinador xeneral, Ramon Argüelles, apostó pola creación d'una axencia específica pal desenvolvimientu de tolos proyectos y recursos que se destinen a la reactivación de les cuenques mineres. El líder d'Izquierda Xunida d'Asturies reprochó al conseyeru Francisco Blanco la so docilidá frente al Gobiernu Central al que, na so opinión, nun hai que dar más confianza si nun esixir cumplimientu de los compromisos llargamente fechos. Lo que ta claro, a xuiciu d'Argüelles, ye que les cuenques precisen, ironizó, "un cambéu de dómina y non una dómina de cambeos", pa concluyir que sobra'l pidimientu d'enfotu al nuevu Ministru: "que paguen, lo que deben", atayó.
Pela so parte, el diputáu Ovidio Zapico aportunó na urxencia d'algamar consensos pa dar respuestes a les necesidaes de les cuenques mineres. "Yo güei quiero llanzar la idega, la necesidá, de que tenemos que llegar a una convocatoria pola supervivencia de les cuenques mineres. Nun Tamos xugando, que tamién, con unos fondos mineros, unos cumplimientos o incumplimientos del marcu del carbón. Tamos falando de muncho más, tamos falando de la supervivencia del los territorios".
El primer pasu pa enfrentar la crisis de les cuenques mineres va ser una moción subsiguiente a la comparecencia d'ayeri, na qu'IX va pidir un plan de choque, que va tener que ser apautáu colos axentes sociales y colos Conceyos, y nel que va haber que definir les llínees estratéxiques y, amás un Plan de Desenvolvimientu Económicu".
La xunta en La Pola Llaviana punxo tamién nel disparaderu al presidente d'ACOM y tamién rexidor de Llaviana, Adrián Barbón. Asina, la coordinadora d'IX nesi conceyu, Leticia Gil, alvirtió a Francisco Blanco que nun se confunda" respectu al papel del alcalde llavianés: "los alcuerdos a los que llega (el conseyeru d'Industria) con Adrián Barbón nun son estensibles a tolos conceyos mineros nin a tolos Conceyos y menos nos que Gobierna Izquierda Xunida". Y ye que, subyacíen entá les declaraciones del responsable d'Industria quien ayeri, na Xunta, aseguraba que caltuviera xuntes colos alcaldes de les cuenques mineres. Sosprendentemente, y a pesar de qu'IX Gobierna en bona parte de los terriotorios del carbón, nengunu de los alcaldes nin alcaldeses de la formación sofitaba tal afirmación.
Nesi mesmu sentíu manifestóse tamién la secretaria de política municipal d'IX, Gabriela Álvarez, que recordó qu'IX ye la fuerza con mayor representación municipal nes cuenques mineres, colo que, añedió, "rescampla que cualquier actuación o cualquier plan de desenvolvimientu de les cuenques nunca va poder ser al marxe de los conceyos. Y eso ye lo que tán esixendo yá los nuesos alcaldes ACOM. Quier sabese, esactamente, qué proyectos tien previstos el Principáu".
Nel alcuentru de responsables d'IX nos territorios mineros alcordóse, amás, la realización d'iniciatives n'ámbitos locales. Gabriela Álvarez, avanzó que, amás d'en la Xunta Xeneral, van llevase mociones a los Conceyos, empobinaes a primir a les distintes alministraciones implicaes pa sacar a les contornes mineres del procesu de deterioru actual.
Dos lineas de trabayu na Xunta y tamién nos Conceyos.
Diputáu Autonómicu y Coordinador d'IX
Diputado Autonómico
(Mas Asturies)
Diputada Autonómica
Convocatoria por Asturies