Menu

Izquierda Xunida impulsa los díes 3 y 4 de marzu les xornaes Gobierno local y democracia participativa coles mires d'estudiar y aldericar los diversos modelos de participación Javier Suárez Llana: "Ye necesariu revisar el modelu de presupuestos participativos puestu en marcha en Xixón no que tien que ver col tipu de participación, que foi solo virtual, y no que tien que ver con cómo se combina la participación individual cola participación colectiva”

“Xixón precisa tener un modelu integral de participación ciudadana” podría ser la síntesis de la rueda de prensa qu'ufiertaron el Voceru del Grupu Municipal d'Izquierda Xunida de Xixón, y Javier Suárez Llana, Secretariu d'Ellaboración, Programa y Participación d'Izquierda Xunida d'Asturies. Coles mires de estudiar y aldericar los diversos modelos de participación, Izquierda Xunida impulsa los díes 3 y 4 de marzu les xornaes Gobierno local y democracia participativa nes que van participar, ente otros, Nacho Murgui (Conceyal  de Coordinación Territorial y Asociaciones del Conceyu de Madrid), Toni Morillas (Esperta en Planificación de Procesos Participativos y Responsable  de Procesos Participativos Internos d'Izquierda Xunida) y Fernando Pindado (Comisionado de Participación y Democracia Activa del Conceyu de Barcelona).

Les Xornaes sobre modelos de participación van tener llugar la primer fin de selmana de'l mes de marzu nel Muséu del Ferrocarril: "Xixón puede presumir de tener un texíu asociativo bien importante que trabayó de manera fundamental nel desenvolvimientu de la ciudá y en xenerar una rede de servicios públicos envidiables pero llegó'l momentu de dar un saltu cualitativu, de que los ciudadanos coparticipen na cogobernabilidad de la ciudá", esplica'l voceru municipal de la organización, Aurelio Martín. Pa ello «fai falta midíes que favorezan una cultura de la participación. Ye necesario que'l Conceyu interaccione colos ciudadanos, porque nun va cayer del cielu» apuntó'l voceru, coles mesmes que reconoz que «tol mundu diz que quier participar más y depués los procesos que se abren queden per debaxo de les mires.

Per otra parte, el Secretariu d'Ellaboración, Programa y Participación d'Izquierda Xunida d'Asturies, Javier Suárez Llana destacó que “l'oxetivu d'IX con esta xornada ye contribuyir a un alderique que ta abiertu non solo en Xixón, sinón n'otres ciudaes d'Asturies y del restu d'España, y que tien que ver con cómo se definen y diseñen los nuevos modelos de participación ciudadana nos conceyos”. Pal Secretariu d'IX Asturies les xornaes “han de sirvir d'espaciu y de ferramienta de trabayu col texíu social, pa qu'al traviés de la conocencia d'esperiencies que se tán desenvolviendo n'otros conceyos, xeneremos un alderique que contribuya a que Xixón y otros conceyos d'Asturies avancen na incorporación de preseos y elementos de la democracia participativa en tou aquello que tien que ver col gobiernu de la ciudá”.

Suárez Llana fizo fincapié en que “hai distintes ciudaes que tán incorporando estes ferramientes al gobiernu y la xestión de los sos conceyos, pero n'Asturies ye una asignatura que tenemos pindia.

Xixón foi una ciudá pionera en polítiques de participación ciudadana al calor de la so adhesión a la Llei de Grandes Ciudaes, y la primer ciudá en cuntar con una Conceyalía de Participación”. Sicasí, “son esquemes que yá nun sirven y que nun respuenden a les necesidaes de la ciudá. Ye necesariu qu'haya una evolución nos preseos, les dinámiques y los procesos, y esa reflexón tien que faela tamién el texíu social. El movimientu vecinal de los años 70, 80 y 90 que contribuyó a construyir el Xixón que güei conocemos nun puede ser el mesmu movimientu vecinal que güei busque dar respuesta a les necesidaes de Xixón. Lo mesmo que'l movimientu xuvenil, les asociaciones culturaes y sociales o los clubes deportivos”.

A lo último, Llana plantegó la necesidá de revisar el modelu de presupuestos participativos puestu en marcha en Xixón “no que tien que ver col tipu de participación, que foi solo virtual, y no que tien que ver con cómo se combina la participación individual cola participación colectiva”. Nesi sentíu destacó'l modelu de presupuestos participativos puestu en marcha va años por IX nel Conceyu de Grao que supunxo “una esperiencia piloto n'Asturies”.