Menu

Formación feminista y "alfabetización" dixital y sexual como víes pa poder lleer les informaciones que lleguen de los medios y que potencien y xeneren distintes violencies machistes

El coordinador xeneral d'IX Asturies, Ramón Argüelles, apostó güei n'Avilés pola educación como vía indispensable contra les violencies machistes y pa la igualdá. El máximu responsable d'Izquierda Xunida participó esta mañana na apertura de les Xornaes Feministes que, mientres el día de güei entamó la formación.

Ramón Argüelles aportunó, sicasí, na necesidá de caltener la discriminación positiva, toa va que, anque haya lleis pola igualdá inda queda una tiez machista que pon torgues pa llograr la igualdá efectiva. "Lo que reivindicamos ye la igualdá. Paez mentira que tamos yá nel sieglu XXI y, sicasí, tenemos vieyes lacras como la violencia de xéneru, como la marxinación de la muyer. Tenemos que dir educando por que esta sociedá sía más xusta y tengamos toos les mesmes oportunidaes".

La secretaria d'Igualdá d'IX Asturies, Nidia Gómez, destacó la necesidá de "avanzar na formación feminista, que tanta falta fai nuna sociedá como l'actual". Y ye que, recordó, "el terrorismu machista ta matándonos acaldía y onde les violencies machistes tán presentes acaldía na sociedá".

Frente a los qu'aseguren que la desigualdá yá se superó que la muyer yá tien tolos sos derechos garantizaos, Nidia Gómez refugo esi idílicu escenariu yá que, dixo, "nun hai una igualdá efectiva porque sigue habiendo una diferencia salarial ente homes y muyeres, siguen asesinándonos acaldía y enfrentamos acaldía a los retos del machismu que vive na sociedá, que dacuando ta invisibilizado pero que ta ende".

Esi machismu invisible relluma dacuando con tola lluz, como cuando fai solo unos díes, criticó Ramón Argüelles, un diputáu polacu xustificaba que les muyeres ganaren menos por ser inferiores. "Mientres haya xente que piense asina y que represente a otres persones tenemoslo complicao y por eso hai que siguir trabayando".

La mañana siguió cola intervención de La sexóloga y doctora n'educación, Soraya Calvo, qu'incidió en cómo'l conceutu sexual tien influencia dende'l puntu de vista de la cultura o de los estereotipos. "D'una idea de sexualidá hetero-centrada, sexista, machista y cómo tou esti conceutu qu'esiste sobre sexualidá, qu'a lo último se mete na cabeza de les persones y faen un ideariu que compartimos toles persones que consumimos medios de comunicación y que vivimos nuna redolada como na que tamos viviendo".

Pa Calvo, esi conceutu xeneralizáu de sexualidá, precisamente, favorez y potencia situaciones de homofobia o transfobia, por culpa, esplicó, "de toos esos referentes y toos esos estereotipos que tamos tolos díes consumiendo al traviés de los distintos medios colos que convivimos".

El problema principal va más allá de la programación y parte, a xuiciu de Soraya Calvo, de la educación. Como exemplu, respondió a qué significa que 50 Solombres de Grey sía una serie d'ésitu. "Puede gustanos 50 Solombres de Grey siempres y cuando síamos capaces de faer una llectura crítica d'esi productu. Claro, si resalvamos qu'eso ye ficción, y qu'amás una ficción bastante mal fecha, na qu'entren en xuegu bien de estereotipos, munches idees bien errónees de lo que ye'l BDSM, que ye no que se supon que se basa 50 Solombres de Grey, pos fai falta alfabetización dixital y mediática pa poder lleer los medios, pa poder lleer informaciones que vienen de los medios y, poques gracies, fai falta educación sexual".

La conceyala d'IX Carmen Conde aportunó, na so intervención d'apertura na necesidá d'educar p'acabar coles cultures machistes y abogó por un nuevu marcu de relaciones basaes na igualdá.