Menu

IX considera insuficientes les midíes actuales y sorraya que nun son necesaries grandes cúpules p'ameyorar la contaminación na zona Oeste

La Conseyera d'Infraestructures y Mediu Ambiente refugó esta mañana na Xunta Xeneral, como representante nel Conseyu d'Alministración de l'Autoridá Portuaria del puertu d'El Musel, pidir l'impulsu d'obres necesaries pa esaniciar riesgos de nubes de carbón que davezu soporten los vecinos de la zona oeste de Xixón como podríen ser el cubrimientu de les instalaciones de graneles, tal como proponía'l diputáu d'IX, Ovidio Zapico. Belén Fernández aseguró que “aspiren a siguir ameyorando” pero estes midíes de “plena cubrición”, al so xuiciu, tendríen un costu "elevadísimu", d'ente 300 y 500 millones d'euros, que güei nun entra ente les sos previsiones de reivindicación yá que “nin ye vidable nin proporcionáu”.

Dempués d'escuchar numberar les midíes de riegu, apantallamientos y pavimentación tomaes dempués de nubes de carbón y revisiones de los planes del aire realizaos por Belén Fernández, Zapico sorrayó que'l Principáu tien de ser más ambiciosu nos proyectos de meyora pa El Musel y asumir que nun ye necesariu llegar a grandes cúpules p'ameyorar el trasiegu de graneles y evitar los problemes de contaminación na zona d'Oeste de Xixón, dellos derivaos de la industria pesao, y otros que sufren por un manexu desaparente de los graneles en redol al Musel”.

Les midíes mentaes por Belén Fernández son consideraes “insuficientes” pol diputáu d'IX, quien detalló que la carbonilla y les nubes nun son daqué inusual nel marcu d'un puertu por excelencia carboneru, que movió l'añu pasáu 21 millones de tonelaes, el 50% d'elles de carbón. De la mesma, el parllamentariu d'IX denunció que'l sistema de manexos de graneles ye bien similar al d'hai 100 años. Con una semeya na mano esplicó la falta de cintes cubiertes, les parvas ensin cubrir o l'ausencia de apantallamientos, ente que punxo como exemplu los puertos de La Coruña o Santander que sí tomaron midíes pa cubrir el tresporte y almacenamientu de los graneles. Tampoco escaeció l'exemplu propiu nel manexu de carbón como ye'l del llavaderu de Batán o la térmica de La Pereda, que yá dieron solución a los mesmos problemes qu'agora se plantegen en Xixón.