Menu

El voceru d'IX alvierti al PSOE de qu'una vegada aprobada la rebaxa col PP “nun llamen a les formigues a faer nuevos esfuerzos”

Gaspar Llamazares, voceru parlamentariu d'IX na Xunta Xeneral, criticó esta mañana la hipocresía de les fuerces que sofitaron rebaxar l'impuestu de sucesiones y donaciones, el PP y el PSOE y Podemos, por distintes razones y llanzó, al empar, un nuevu avisu al Gobiernu, una vegada qu'esti aprobó la rebaxa d'impuestos cola derecha. “Cuando ustedes xúnense a los billorios nun nos llamen pel iviernu, nun llamen a les formigues a faer nuevos esfuerzos”, alvirtió al PSOE.

Para Llamazares, Asturies non puede dexase esta rebaxa dende'l puntu de vista de la xusticia fiscal nin del sostenimientu de la comunidá autónoma. Por eso, punxo de relieve la hipocresía del PP. “ Porque ustedes rebaxen l'impuestu allá onde nun tienen el poder político, porque onde tienen el poder político nun lu anulen”, alvirtió. Ye un impuestu estatal y Montoro nun lo tocó, y en fraude de llei, pretenden acabar col impuestu nes comunidaes autónomes, sorrayó.

Respeutu al PSOE considera Llamazares que ye hipócrita querer confrontar col Gobiernu central porque acuta'l marxe de déficit, cuando ta acutáu de resultes de la rebaxa del impuestu de la renta de Montoro y representa 5.000 millones d'euros que pagamos les comunidaes autónomes.

La hipocresía de Podemos, dixo, ye nun votar les enmiendes d'IX, baxu la escusa de que los torgaron dixebrar les votaciones. “Yo pidí dixebrar les votaciones y vamos votar la inmensa mayoría de les sos enmiendes y nun voi votar solo xuna, aquella que pretende aumentar el mínimu exentu a 200.000 euros”, apuntó, por culpa de qu'IX amenorgar a 150.000 euros.

Llamazares abogó pol afitamientu del impuestu de sucesiones y donaciones porque xuntu al de la renta ye'l más xustu, directu y progresivu qu'esiste. “Vamos defendelu ensin ambaxes”, esplicó pa puntualizar que ye una fuerza político d'izquierdes y tien una posición al respective de los impuestos y los servicios públicos.

Llamazares punxo de relieve una última “hipocresía” más grave: que nesta comunidá autónoma preséntense día sí y día tamién, con total llexitimidá, iniciatives contra la probeza y la desigualdá y asina lo demuestren los últimos datos del Bancu d'España sobro la desigualdá. La desigualdá nesti país doblóse a lo llargo de la última década, ente la renta más baxa y la más alta, aprofió Llamazares, que remarcó tamién que, amás na dómina de crisis los que más sufrieron son los salarios más baxos, que nestos momentos precisaríen trés años pa pagar les deldes y los patrimonios más altos crecieron na crisis y siguen creciendo.

Dempués de que'l patrimoniu más altu pasara de tener el 30% del país al 50%, ustedes van sancionar esta llei que llibera al 3% de patrimoniu más altu de pagar l'impuestu, que prácticamente convierte l'impuestu en residual n'heriedos directos, aseveró. Llamazares acusó a les fuerces polítiques que sofiten la rebaxa d'impuestos de nun escuchar: el salariu de los mozos ye cada vez más precariu más mediomileurista y hai xuna cada vegada mayor quebra ente mozos y los sos padres. “Prefieren da-yos un carambelu a unos pocos mozos por aciu la renta de los sos padres que da-yos autonomía y movilidá social por que tengan retribuciones dignes. Ye una vergüenza en términos democráticos”.

Dempués Llamazares defendió les enmiendes d'IX pa caltener l'impuestu, que cuntaron solo colos sos votos y l'astención de Podemos, ente qu'IX sofitó toles de Podemos, sacante la que pidía establecer en 200.000 el mínimu exentu frente a los 150.000 d'IX. Pa Llamazares debe d'imponer de sucesiones y de patrimoniu, como lo hai n'Europa y nel mundu, “porque son necesarios impuestos pa garantizar polítiques públiques, y pa garantizar la igualdá de partida, por eso aquellos que cada vez tienen más patrimoniu, inclusive por razones demográfiques, tien d'haber una responsabilidá pública. “Por eso presentamos enmiendes pa caltener un mínimu exentu y convertir la vivienda en bien d'usu, non de cambéu, y pa sofitar a la pequena empresa y non les participaciones empresariales nos heriedos, que queden prácticamente exentes”, esplicó.

Empecé con Maquiavelo y termino con Esopo, dixo Llamazares pa faer referencia a les homilíes del Gobiernu escontra la izquierda”. “Cuando ustedes xúnense a los billorios nun nos llamen pel hibiernu, nun llamen a les formigues a faer nuevos esfuerzos”, concluyó.

La reforma del impuestu de sucesiones aprobada güei, colos votros del PSOE, PP y Ciudadanos y l'oposición d'IX y Podemos, cola astención de Foru, alza de 200.000 a 300.000 euros el mínimu exentu pa nun pagar esti tributu, lo que va implicar que una familia de padre, madre y dos fíos que'l so patrimoniu sía inferior a 1.350.000 euros nun va pagar un euru d'impuestos.