Menu

El voceru recuerda qu'IX robló un pactu de investidura con una llarga llista de promeses incumplíes

Gaspar Llamazares, voceru parlamentariu d'IX na Xunta Xeneral, pidió esta mañana más fechos que palabres al Gobiernu asturianu énte la última ufierta de diálogu realizada la pasada selmana en dos folios, propuestes concretes y puntuales énte los qu'IX ta dispuesta a axustar, anque tamién recordó qu'IX robló un pactu de investidura con una llarga llista de promeses incumplíes per parte de la FSA. “IX ta dispuesta al diálogu, pero sobremanera a los fechos”, alvirtió'l voceru d'IX que tamién se refirió a que ye'l Gobiernu quien tien de liderar el xiru a la izquierda y el pactu con “les trés fuerces polítiques” que pueden da-y mayoría. “Nun vamos a nuevos compromisos si nun hai nuevos fechos”, repitió.

Gaspar Llamazares tamién aseguró que l'Executivu asturianu ten de ser quien busque soluciones, respetando los tiempos de cada partíu, y nun creando problemes en cuenta de solucionalos, por casu en Sogepsa, o na empresa Getic (Gabinete de Servicios Técnicos d'Inspección de Cables) qu'agora pretende privatizar. Asina mesmu, mentó les lleis del Gobiernu en tramitación que “van ser el test pa comprobar la sensibilidá del mesmu”, na Llei de Tresparencia, na de Movilidá, na de muerte Digna…

“Que nun llamen más, nin qu'esperen, que lideren los fechos y cumplan los compromisos”, alvirtió énte la repitida entruga de los periodistes de cuándo se va concretar el diálogu. Al so xuiciu, nun tendría de dilatar se nel tiempu más allá de selmanes, anque tamién incidió en que'l Gobiernu nun puede imponer los sos tiempos.

Llamazares repitió que considera la ufierta del Gobiernu bien probe y más bien burocrática que política y qu'IX yá concretó la so ufierta dirixiéndose a Podemos pa crear un polu d'izquierdes con una propuesta concreta. “Nin tamos dispuestos a aceptar la resignación y falta de lideralgu del Gobiernu nin la rabia como elementu de confrontación por que sí. IX yá respondió al PSOE y a Podemos apurriendo cuál ye la solución”, esplicó na Xunta Xeneral.