Al navegar por esta web acepta la utilización de cookies para análisis y personalización
Saber más    

Noticies Toles noticies d´IX

11/07/2017

IX esixi al Gobiernu que nun vienda la empresa pública GTIC

Llamazares resalta la contradicción del Executivu de reclamar diálogu a la izquierda y privatizar como la derecha

Gaspar Llamazares, voceru parlamentariu d'IX na Xunta Xeneral, y Ovidio Zapico diputáu del mesmu grupu, demandaron esta mañana al executivu autonómicu que paralice de momentu la vienta de la empresa pública GTIC (Gabinete de Servicios Técnicos d'Inspección de Cables), dependiente de la Fundación Barredo. Llamazares acusó al Gobiernu d'usar un doble llinguaxe, per un sitiu pidiendo diálogu y negociación pa llegar a alcuerdos cola izquierda y cola otra mano, la derecha, privatizando empreses públiques en contra de los compromisos adquiríos, colo público, coles cuenques mineres y del propiu Plan de Ciencia, Investigación ya Innovación.

Llamazares calificó de totalmente incomprensible y entainada la vienta d'esta pequena empresa pública, que, a pesar de la so dimensión, realiza una llabor importante na innovación y aplicación nes cuenques mineres, como elementu de reactivación y reindustrialización. GTIC tien de siguir formando parte de la Fundación Barredo y de les medies de reindustrialización. “Ye una piedra más nel camín de les Cuenques Mineres, dempués de qu'apocayá tiempu per decisión del Principáu y la Caxa liquidaren Soft Computing”, alvirtió Llamazares antes de recordar qu'esta decisión de privatizar GTIC cuenta cola oposición del Rectoráu de la Universidá d'Uviéu y el Conceyu de Mieres, que son patronos.

Ovidio Zapico apuntó que GTIC ye una empresa que la Fundación Barredo adquirió en 2007, que se centra na revisión ya investigación de cables pa mines, puertos o estaciones d'esquí, una empresa que podría ser rentable –en 2015 tuvo una delda de 20.000 euros, de dudosu cobru, d'una empresa minera privada- y que “incomprensiblemente” nun cunta con un departamentu comercial, si non que gran parte del so trabayu ye adquiríu por una empresa intermediaria, Auxinosa, que ye quien comercializa l'actividá de GTIC. Zapico apunta que GTIC tendría de tener un departamentu comercial pa consiguir los sos contratos, evitando la intermediaria, que, amás too apunta que ye la máxima interesada n'adquirila nel procesu de compra actual. Zapico convidó a Isaac Pola, nuevu conseyeru d'Industria, a rectificar la vienta y el procesu lleváu a cabu pa la so enayenadura. Zapico recordó que GTIC tien un mercáu consolidáu, ye una empresa bien especializada que cunta acreditaciones prácticamente úniques pa realizar estos trabayos y que mientres munchos años trabayó directamente pa Hunosa y que, paradóxicamente, esos llabores facturalos agora Auxinosa. GTIC cuenta con seis trabayadores y see en Mieres.

Zapico preguntóse, a lo último, porqué una empresa pública que funciona y puede optar a tener beneficios na investigación, en collaboración cola Universidá, va vendese.

Llamazares concluyó asegurando que da la impresión de que'l Gobiernu asume'l discursu de la derecha en cuanto al sector públicu del Principáu y, énte'l primer contratiempu desinvierta, como yá asocedió en con Soft Computing, lo que ye una actitú “hipócrita” de dar sermones un día sí y otru tamién y practicar un xiru a la derecha. Cuestiones como esta, dixo Llamazares, son test que van demostrar la verdadera voluntá del Gobiernu de dar un xiro pala izquierda.

Volver

Compartir

2014 Izquierda Xunida d'Asturies - Política de privacidad - Política de cookies