Menu

El diputáu d'IX revela'l datu constatáu nun informe de Asturagua y considera que'l Cantábricu nun puede ser una cloaca dempués de más de seis millones d'euros de inversión

Ovidio Zapico amosó esta mañana la esmolición d'IX pola situación del saneamientu na villa de Cuideiru. En Cuideiru invirtiéronse más de seis millones d'euros, 1.000 millones de pesetes, nel añu 2000 nun saneamientu que nun ta dando respuesta total a les borrafes de la población, alvirtió'l diputáu d'IX na rueda de prensa qu'ufiertó na escampada del Puertu Nuevu. En redol a un 40-45% d'agües residuales de la villa de Cuideiru tán virtiéndose directamente al mar Cantábricu, concretamente al Puertu Vieyu, certificó'l diputáu autonómicu de la coalición na so comparecencia al pie de la concejala de Vecinos per Cuideiru, Belén Álvarez Bilbao. Ovidio Zapico sofitó estes declaraciones nun informe robláu por Asturagua y rexistráu güei mesmu n'el mesmu Conceyu pola concejala de Vecinos per Cuideiru.

IX rexistró na Xunta Xeneral una serie d'entrugues riquiendo al Conseyeru d'Infraestructures y Medioambiente esplicaciones sobro la situación. “Nun podemos convertir el Mar Cantábricu nuna cloaca y Asturies tien munchos problemes de saneamientu, problemes y déficits importantes”, dixo Zapico. El diputáu d'IX punxo como exemplu la situación de la zona Esti de Xixón, la de la ría de Villaviciosa, con un gran valor medioambiental y apocayá na ría de Navia, amás de núcleos como Cuideiru, bien importante turísticamente.

El diputáu d'IX abogó, dada la importancia de Cuideiru, por arreglar el problema d'arramaos al Cantábricu “de forma rápida” dende la cooperación ente alministraciones, dempués del dineru invertíu nel saneamientu y na depuradora, por qu'agora nun pasen toles agües de Cuideiru por ella, cuando ésta tien capacidá, ta preparada pa recoyer el 100% d'eses agües. “El Gobiernu municipal y el Gobiernu autonómicu tienen d'aplicar les soluciones técniques necesaries pa evitar los arramaos y que tol saneamientu pase pola depuradora y arrame al traviés del emisariu toles agües, una vegada depuraes, en cuenta de dir directamente al Puertu Vieyu”, sostuvo.

Les entrugues rexistraes na Xunta Xeneral al Gobiernu son les siguientes: ¿ Tien el gobiernu conocencia de qu'una parte bien significativa de les agües residuales de la villa y del conceyu de Cuideiru arramen directamente al mar, ensin nengún tipu de depuración, a pesar de la esistencia d'una Estación Depuradora d'Agua residual, lo que podría frayar la Directiva 91/271/CEE?; ¿conoz les razones d'esa situación?; ¿definió les soluciones técniques necesaries pa correxila y el presupuestu que riquiría la so puesta en marcha?;¿Púnxose en contactu'l Conceyu de Cuideiru col Gobiernu pa establecer una solución al problema d'esi arramáu directu d'agües residuales?; ¿Evaluáronse los defectos, bien fuera nel proyectu constructivu, bien na so execución final, del sistema de saneamientu de la villa de Cuideiru que podríen esplicar esta anomalía?.

Pela so parte, Belén Álvarez Bilbao, conceyala de Vecinos per Cuideiru, recordó que la so formación empezó a estudiar l'asuntu dempués de ver l'agua turbio que salía por un tubu del muelle vieyu y la cantidá de “moíles” na redolada, demandando los planos del saneamientu y visitando la depuradora. “Reparamos que nel Puertu Viejo cai tanta cantidá d'agües residuales casi como llega a la depuradora y hai otra zona en La Talaya, onde tamién s'arrama”. A la depuradora llega'l 50% de les agües residuales, non la totalidá, esplica la concejala. Vecinos per Cuideiru pidió un informe al Conceyu de Cuideiru, qu'ésti encargó a la empresa Asturagua nel que la empresa reconoz que non tol saneamientu de Cuideiru tán incluyíu nel so contratu, sinón qu'esiste un parte de la que se debe encargar el mesmu Conceyu y esto “nunca se fixo”, alvirtió la conceyala. Belén Álvarez Bilbao alvirtió que “ye bien de lo que s'arrama al mar” y por eso pide una solución pa conectar a la depuradora toles agües residuales.