Menu

Ovidio Zapico y Mino García reclamaron que los banzaos sirvan tamién como elementos dinamizadores del territoriu nos que s'asienten

Izquierda Xunida apuesta por abrir banzaos como'l de Los Afilorios pa usos lúdicos y deportivos, que podríen incluyir navegación ensin motor o pesca ensin chombu. El diputáu Ovidio Zapico y l'alcalde de Morcín, Mino García, visitaron esta mañana esti reservorio xuntu al presidente de l'Asociación de Pescadoeres de Riosa y Morcín, Ignacio Fernández, precisamente para reivindicar l'aprovechamientu d'esti banzáu con fines recreativos, de la que constataron y criticaron l'abandonu de les sos riberes.

“Tamos énte una prohibición que nun s'entiende”, señaló'l rexidor municipal, “siempres que se garantice, col sistema de depuración, l'usu potable de l'agua que va a Uviéu tendríamos de poder esfrutar d'esti espaciu llenu de posibilidaes deportives y turístiques pal conceyu de Morcín”. García anunció que va pidir llueu xuna xunta col presidente de la Confederación pa tresllada-y esti pidimientu, “más lóxica por cuanto en Tañes y Sobrescobiu déxense l'usu de la pesca y l'argumentu de contaminar l'agua d'usu potable baltar cualesquier que visitara Alfilorios, onde claramente nun hai llimpieza nin caltenimientu”.

La reivindicación municipal cuenta col sofitu del grupu parlamentariu d'IX. Pa Ovidio Zapico, l'alderique sobro usos recreativos ye imparable por culpa de que surde dende la mesma sociedá civil y tresciende a los mesmos conceyos y a la Xunta Xeneral. Pa IX, añedió, sería incomprensible qu'esti alderique zarrarase en falsu, ensin atopar l'usu afayadizu pa cada unu d'esos banzaos.

El diputáu esplicó que cada banzáu tien xunas característiques propies que, dixo, tienen de ser les que determinen qué actividaes pueden desenvolvese. “Equí güei, nos Afilorios, en Morcín, y reforzando la presencia de los pescadores de l'Asociación, la pesca ensin chombu puede ser una d'estes posibilidaes d'usu recreativu”:

L'apertura de los banzaos a distintos usos tien qu'inscribise nun plan de dinamización de los llugares en que s'asientan. “Agora mesmu, los territorios mineros precisen munchos pequenos recursos pa poder poner en valor el so territoriu y pa frenar, per un sitiu la despoblación, y, per otru llau, poder ufiertar a la población y a los mozos qu'equí queden distintes alternatives que vaigan creando un texíu económico”, acotó'l diputáu.

Y nesta necesidá d'abrir los banzaos a distintos usos, Zapico pidió, dende'l respetu al procesu de primaries del PSOE que, “gane quien gane” enceten l'alderique con “valentía y naturalidá”.

Tamién los pescadores reivindiquen la recuperación d'un usu que yá tuvieron con anterioridá, “equí vieno Gabino, l'ex alcalde d'Uviéu, y echó truches pa pescar y hai 8 años prohibió daqué que veníamos faciendo dende siempres”, afirmó'l presidente de Asprimo. L'asociación, con 100 socios, espera poder cuntar con una zona acutada pa pesca y poner en marcha un proyectu pioneru “una zona de pesca accesible pa persones con discapacidá”.