Menu

La diputada d'IX demanda al Conseyeru nin un pasu más na privatización de les estaciones asturianes

La diputada d'IX, Concha Masa, preguntó esta mañana al Conseyeru d'Educación, Cultura y Deportes cómo ye posible que casi un añu dempués del anunciu de la puesta en marcha d'una cinta pa primerices y primerizos na estación d'esquí de Valgrande-Payares, como compensación del zarru del remonte del Cuitu-Negru ésta nun s'abriera inda. Ye, a xuiciu de la diputada d'IX, una nueva situación de falta d'axilidá abonda pa tener les coses en marcha cuando se precisen, como pasen coles places d'interinos y otros exemplos del so departamentu. “Debío a la mala xestión de la Conseyería y la Dirección Xeneral de Deportes”, alvirtió Masa. Per otru llau, la diputada tamién faló sobro los planes que tien en relación a la xestión de los dos aparques d'esquí asturianes y recordó-y el claru apueste d'IX pola xestión pública, demandando un compromisu pa caltener la xestión pública de les estaciones y “nun dar nin un pasu más na privatización”, frente a lo que ta asocediendo en San Isidro, yá avanzada la privatización.

Genaro Alonso, que reconoció'l retrasu na xestión de la nueva cinta pa primerices, aseguró que les sos previsiones son que tea llista pa la ponte d'antroxu del añu próximu y volvió citar como inversión prevista la mesma partida yá anunciada pa la cinta anguaño, al pie de 2 kilómetros nuevos esquiaderos y 200.000 euros pa la revisión preceptiva” d'un remonte. Al respective de Fuentes d'Iviernu anunció la inversión de 300.000 euros nos próximos presupuestos pa una máquina pisapistas y xuna moto de nieve.

Tocantes a la estación de Fontes d'Iviernu, Alonso declarose firme defensor de la fusión” con San Isidro p'algamar 80 kilómetros de pistes esquiaderes, pero dixo qu'esiste un problema porque la Diputación de Llión pretende qu'Asturies asuma 3 megavatios na llínea d'alta tensión, “cuando nós precisamos solo 1 y nun vamos asumir más de lo que precisamos. Sería un millón d'euros”, cifró'l conseyeru. Alonso tamién esplicó que la Diputación dio pasos escontra un modelu priváu y “nós defendemos un modelu de xestión pública”.