Menu

Mayka Barros recuerda que la fienda salarial fai que les muyeres trabayen 96 díes al añu gratis

Izquierda Xunida d'Asturies va sofitar les movilizaciones y paros entamaos por Comisiones Obreres (CC OO) y Unión Xeneral de Trabayadores con motivu del 8 de marzu y les reivindicaciones nel día internacional del la muyer, qu'anguaño lleva como bandera la llucha contra la fienda salarial. La secretaria de movimientos sociales, Mayka Barros, aseguró güei, na rueda de prensa conxunta con dambes centrales, que “sobren los motivos” pala movilización. “Sofitamos la fuelga del 8 de marzu, nel nuesu casu, yá dende l'ámbitu federal vamos faer fuelga, lo cual nun quier dicir que tamién sofitemos los paros”, aseguró Barros quien, amás, enfatizó en que dende IX se trabayará pa “visibilizar” les acciones que s'entamen polos sindicatos nesos paros de dos hores.

“Motivos pa esta fuelga, desgraciadamente, sobren y son diarios: falamos d'una fienda salarial -apurríennos antes datos nel sindicatu- que supon que les muyeres n'Asturies tamos trabayando 96 díes gratis al añu. Yo creo qu'eso nengún otru colectivu puede sostenelo. Hai una fienda que non solo ye salarial, sinón tamién d'oportunidaes, el famosu techu te cristal”, denunció la dirixente d'IX.

Mayka Barros recordó qu'el 8 de marzu ye amás una fecha de denuncia xeneral. Asina, amás de la reivindicación llaboral, la conmemoración pretende visibilizar cuestiones de tal caláu como la lacra de la violencia machista, que supunxo l'asesinatu nos postreros 14 años d'un millar de muyeres, o les agresiones sexuales que se cierren con una muyer víctima de les mesmes cada 8 hores. “Sobren los motivos, por desgracia” aprofió la secretaria de Movimientos sociales, quien tamién recordó que nos actos, nesti casu al traviés de la secretaria d'Igualdá, Nidia Gómez, ta trabayándose y collaborando cola Plataforma Feminista. “Les muyeres nun tienen de tener nenguna dulda de que los sindicatos, nesti casu tanto CC OO como UXT, sofiten toles reivindicaciones y, amás, lleven enforma tiempu faciéndolo”.

Mayka Barros comparecía ante los medios tres una xunta de trabayu al pie de los máximos responsables de les centrales sindicales y d'Izquierda Xunida. Ello ye que poco primero de la rueda de prensa, los secretarios xenerales de CC OO y UXT, José Manuel Zapico y Javier Fernández Lanero, según el mesmu coordinador xeneral d'IX, Ramón Argüelles, consensuaben acciones, al pie de les secretaries d'igualdá de dambes centrales, Ana María Rodríguez y Carmen Escandón, la secretaria de Política Municipal y el secretariu d'Acción Política d'IX, Gabriela Álvarez y Juan Ponte, de cara al 8 de marzu.