Menu

El voceru d'IX pide esmolición polos pensionistes y non por clases medies qu'herieden 1,5 millones d'euros

Gaspar Llamazares, voceru parlamentariu d'IX na Xunta Xeneral, demandó al Presidente del Principáu, un proyectu de llei de creitu estraordinariu que tenga como prioridaes l'ambición social y l'aumentu d'inversión na comunidá autónoma que, al so xuiciu, vive un momentu determinante por cuenta de la prórroga encadenada, sumada a la prórroga del Gobiernu Central y a la nueva llei de contratación. Por cuenta de esta postrera y si les conseyeríes nun cunten con pliegos de contratación unificaos los proyectos d'inversiones podríen retrasase un mes o dos, añedió.

Esti foi l'esbozu realizáu por Gaspar Llamazares na so vez d'entrugues al Presidente sobro les repercusiones de la prórroga en materia social y d'inversiones. Llamazares alvirtió que “el retayu” va suponer 115 millones menos que nel proyectu de presupuestos, xuníu a los 116 millones d'euros que Montoro nun apurrió como adelantu a cuenta y, amás, el ministru de Facienda axusta “al alza” cambeos que van pagar les comunidaes autónomes, como pue ser la xornada de 35 hores o la equiparación de los funcionarios. “Ye una situación presupuestaria bien comprometida”, resumió'l voceru d'IX, de la que reconoció la “fonda esmolición” d'IX.

El voceru d'IX añedió un cuartu elementu al so argumentu sobro la necesidá d'un creitu estraordinariu con vocación social y d'inversión, que recueya cambeos na Universidá, el salariu social o'l 0 a 3. “Por fin tenemos que dicir qu'apaeció na política española la cuestión social”, alvirtió. Llamazares aseguró que-y llama l'atención la esmolición del PP poles clases medies, y non polos pensionistes, que tán pidiendo na cai una meyora de les sos pensiones, pidiendo igualdá social y terminar cola violencia de xéneru… lo que precisa un sistema fiscal xustu y progresivu, qu'el que más tien más pague. “Eso ye lo que m'esmolez y non tantu les clases medies d'un millón y mediu d'heriedu. Creo que nun llega nin al 1% los que pueden dar a cada fíu un millón y mediu d'heriedu”, concluyó.

Pela so parte, Javier Fernández respondió que la prestación y servicios públicos y la so calidá global ta garantizada y pa eso prepara Gobiernu'l proyectu de llei de creitu estraordinariu pa escosar la cobertoria de política social y d'inversiones. Tamién apeló a la responsabilidá de los grupos pa sofitar esti postreru. Apuntó que'l salariu social precisa 15 millones d'euros más y que pueden perdese 13 millones pa les polítiques actives d'empléu, retrasar la unidá de convalecencia del ERA o los fondos FEDER.