Menu

La diputada d'IX demanda incorporar nes distintes convocatories, concursos y subvenciones esta titulación

La diputada d'IX na Xunta Xeneral, Marta Pulgar, va defender la incorporación na alministración pública y nel sector públicu autonómicu de la categoría profesional de Técnicu d'Integración Social como base calidable d'atención nos servicios públicos y en defensa d'una titulación específica que s'imparte n'Asturies dende hai más de 20 años. Na Proposición Non de Llei, que se va someter a votación del restu de los grupos esti próximu vienres, tamién s'inclúi la incorporación nes distintes convocatories, concursos y subvenciones promovíes pola alministración pública y el so sector públicu pal desenvolvimientu de programes empobinaos directamente a la intervención social en materia d'emplegu, sanidá, educación y servicios sociales, les titulaciones necesaries pa ocupar los puestos que vaigan desenvolver les xeres que se promuevan nos mesmos. Esa titulación necesaria va ser asignada en función de les competencies que se vaigan a desenvolver y estes tán recoyíes nel marcu llegal vixente de cada titulación.

Xuntu con miembros de l'Asociación de Técnicos d'Integración Social, Marta Pulgar apuntó que l'oxetivu qu'escuerre la iniciativa tien que ver cola calidá de l'atención de los servicios empobinaos a persones, nun sentíu ampliu, non solo nel aspeutu social, sinón tamién en materia educativo, d'emplegu y sanitario. “La calidá n'atención a les persones ta bien rellacionada cola especialidá de los profesionales y hasta el momentu hai ciertu déficit, porque nun se tienen en cuenta titulaciones específiques pa esta atención”, aseguró Pulgar. La diputada d'IX señaló qu'esiste un ciclu de Formación Profesional de grau cimeru, con capacitación regulada a nivel estatal y “desgraciadamente nun se ta aplicando”.

La iniciativa abre la puerta a la incorporación d'estes categoríes, al traviés de la negociación colectiva, na función pública y a que nes places que se convoquen téngase-yos en cuenta y que, en tolos programes alcordaos, reconózase-yos la titulación como requisitu. Esisten alredor de 1.000 profesionales titulaos n'Asturies, munchos de los cualos tuvieron que dexar la rexón para trabayar y tan faciéndolo notres comunidaes onde yá se reguló. Esti ye'l casu, como citó Pulgar, de Cataluña, País Vascoo Andalucía.

Hasta'l momentu solo puen aportar a l'alministración a puestos con titulación más baxa que la suya, cuidando que nun ta recoyida na Relación de Puestos de Trabayu. Por casu, deben presentase a puestos d'auxiliar educador, onde solo se pide Educación Secundaria.

Nerea Ferreira, miembru de l'Asociación, reconoció que l'aprobación d'esta Proposición Non de Llei sería'l “primer pasu escontra la reconocencia de la categoría profesional, qu'hasta agora nun figura dientro relación de puestos de trabayu”. “Ye un asuntu clave por que les persones que realicen esti ciclu de Formación Profesional vean regulaos, por fín, los sos estudios “, esplicó na sala de prensa de la Xunta Xeneral.

Pela so parte, Aitor Sánchez esplicó qu'esti asuntu non solo afecta a los profesionales que cursaron o cursen unos estudios ensin regulación o una regulación efectiva sobresaturada, sinón qu'afecta a los usuarios.