Concha Masa considera que ye una reivindicación xusta que repercute na calidá de la enseñanza
La Xunta Xeneral, al traviés d'una Proposición non de Llei conxunta d'IX y Podemos, encamienta al Conseyu de Gobiernu a amenorgar con calter inmediatu'l númberu d'hores lectives del profesoráu de Primaria y Secundaria, hasta un máximu de 23 y 18 sesiones selmanales respectivamente, na llínea de recuperación de derechos que se ta llevando a términu n'otres comunidaes autónomes. La iniciativa cuntó colos votos a favor de los dos grupos proponentes, amás de Ciudadanos, Foru y PP. Solo'l PSOE votó en contra argumentando que se trata d'un aumentu horariu frutu de la lexislación del PP.
Concha Masa, diputada d'IX responsable d'Educación, recordó qu'esta iniciativa respuende a una “llarga y xusta reivindicación del profesoráu”, intensificada nos últimos meses y pala que va siendo hora de que se tome en considerancia. “Ye una reivindicación d'un colectivu perimportante qu'afecta de forma bien directa a la calidá de la enseñanza pública”, dixo Masa. La diputada aseveró que tres el Real Decretu del Gobiernu del PP sol eufemismu del amenorgamientu del gastu públicu aumentaron los horarios del profesoráu y, amás de la mesma carga lectiva que representa esi amonte, tamién supunxo, de resultes directa la perda de 800 puestos de trabayu, amás d'otres indireutes como l'empeoramientu en ratios, la perda calidable n'atención a la diversidá, menos desdobles, menos sofitos, refuerzos… inclusive hasta l'atención a les families.
Masa apuntó que la educación pública ye más democrática, igualitaria, integradora, ocupar por igual de toos, educa en valores… y por otros munchos otros valores. “Esiximos de la Conseyería d'Educación que caltenga una actitú de respetu y sofitu a la educación pública. Pa caltener esa calidá ye necesariu apostar por ella”, concluyó.
