Menu

El coordinador cree que ye posible aprovechar lo que queda de llexislatura y propón una axenda política que pase pol fin del hostigamientu a los Conceyos y la consecución de consensos pola izquierda

Izquierda Xunida pidió güei al executivu de Javier Fernández qu'asuma les sos responsabilidaes, tomando la iniciativa política d'Asturies en cuenta de tar “viéndoles pasar”. El coordinador xeneral, Ramón Argüelles, fixo güei un llamamientu p’aprovechar lo que queda de llexislatura, buscando alcuerdos que dexen dar respuesta a les necesidaes de la Comunidá Autónoma, empezando pola Llei de Creitu Estraordinariu como primer pasu para llograr más alcuerdos pola izquierda. La propuesta d'IX pasa por un cambéu na política autonómica escontra los Conceyos, apostar por midíes y mayoríes que sirvan pa desaniciar los efectos negativos de la transición enerxética, y una axenda lexislativa pa tratar de sacar alantre lleis tanto sociales como de tresparencia y Gobernanza.

En materia municipal, Argüelles esixó un cambéu, por culpa de que, dixo, el Principáu bánciase ente ponese de perfil énte los problemes y necesidaes de los Conceyos y el “hostigamientu” en materies que van de los Planes d'Emplegu a Salvamentu y llimpieza de sableres.

Tocantes a la transición enerxética, el coordinador xeneral d'IX recordó que, por más que se refugue la carbonización exprés, el carbón, “adulces va dexar d'usase”, polo que son imprescindibles midíes pa favorecer un procesu ordenáu y xustu. “Eso, nel nuevu modelu de financiamientu tamién tien que venir: tamos viendo como'l Gobiernu del PP prima a otres Comunidaes porque-y aprueben los presupuestos. Tamos falando del País Vascu, por casu, que yá l'añu pasáu tocó-y el cuponazo, non el cupu, y anguaño presumiblemente va llevar otru cuponazu, de tala manera qu'hasta Ciudadanos se sollerta porque diz que puede llevar hasta la tesorería de la Seguridá Social”.

Frente a esti modelu que ruempe los equilibrios territoriales, Argüelles reclamó qu'en financiamientu se tengan en cuenta tolos factores qu'inflúin na xestión y prestación de recursos y servicios. Población, territoriu, orografía o avieyamientu son elementos que deben de valorase, y otros d'estructura y coyuntura granible y económica, nesti casu, los efectos de la descarbonización. “Dende IX d'Asturies ufiertámonos al presidente a ser una fuerza más pa impulsar un nuevu financiamientu más xustu”.

Pa terminar, Argüelles reprochó la falta d'iniciativa del Gobiernu en materia lexislativo, teniendo que ser la oposición quien asuma esta responsabilidá. “Nun s'aprueben lleis nesti Parlamentu”, llamentó, yá que al so xuiciu pa llograr meyores ye imprescindible qu'éstes se vean reflexaes en testos llegales. “Queda menos d'un añu, pero hai lleis que yá tán ellí, en procesu de tramitación. Por desgracia, dalguna yá se baltó: recordáis qu'había una llei d'emerxencia qu'axustáramos con Podemos y qu'amenorgaba sobremanera los plazos pala concesión de derechos; pos esa llei, al nun aprobase los presupuestos el PSOE baltola pero, entá asina, entá queda otra nuesa ende que son derechos vitales básicos”.

Y nun ye la única. Asina, el coordinador d'IX recordó la necesidá de sacar alantre la Llei de Memoria Democrática, que ta avanzada, o la de Tresparencia y Bon Gobiernu.

“Tenemos una oportunidá, entá nun ta perdío too”, concluyó Argúelles, pa quien inda ye posible demostrar que los 28 escaños de mayoría d'izquierda, del PSOE, Podemos ya IX, tienen capacidá pa consensuar y aprobar midíes beneficioses pala sociedá.