Ovidio Zapico demanda que la reforma integral d'El Campu a L’Infiestu sía una prioridá con plazos establecíos
La Xunta Xeneral del Principáu esixe al Gobiernu l'arreglu de la carretera que xune Casu con Infiesto, la solicitú d'ayudes del Gobiernu central para embrivir la repercusión del semiaislamiento vivíu en Casu dempués de la cayida d'un argayu na carretera, amás de la realización d'eventos, como'l Día d'Asturies, o del Mediu Ambiente nel conceyu pa desaniciar les repercusiones de la “agónica” situación que se vivió, sobremanera, a finales de marzu y principios d'abril y entá sigue. Este ye'l conteníu de la Proposición Non de Llei d'IX aprobada esta mañana por unanimidá, defendida pol diputáu d'IX, Ovidio Zapico, coles presencia de conceyales de Casu y Sobrescobiu y la responsable de política municipal d'IX, Gabriela Álvarez.
Ovidio Zapico, diputáu d'IX, pidió que sía pal Gobiernu rexonal una prioridá la reforma integral de la carretera ente El Campu y Infiesto. “Somos conscientes de qu'en próximos meses va empezar les obres d'un tramu, d'ocho kilómetros, pero esperamos continuidá nos siguientes y haya xuna planificación”, alvirtió'l diputáu al respective de les obres programaes. Sicasí, Zapico nun resalvó'l papel del Partíu Popular, quien tien d'esplicar que fixeron colos 200 millones d'euros que furtiaron a los territorios mineros, incluyida esta obra, lo que güei fadría qu'esa situación nun fuera tan grave, dixo.
Zapico tamién pidió la negociación col Gobiernu central por qu'habilite per mediu d'un decreto llei ayudes pa los afectaos. Pa Ovidio Zapico danse los requisitos y condiciones necesaries pa solicitar ese decreto llei. “Va selmanes qu'esperamos xuna xunta col Delegáu de Gobiernu y el PP nun nos dio respuesta”, llamentó.
El diputáu d'IX sorrayó la necesidá de tener presente l'Asturies rural y, amás, la situación que se produció a partir del 22 de marzu cuando les dos víes alternatives de comunicación, la d'accesu por Tarna y la de la Collada d'Arniciu, taben condicionaes, pola situación meteorolóxica y, nel segundu casu, xuníu al llaceriosu estáu de la infraestructura pol abandonu total d'alministraciones mientres les últimes décades.
Zapico, a lo último, incidió en qu'esta enllargada situación, inda ensin normalidá plena , repercute na economía del conceyu y tamién nel accesu a los servicios pa los ciudadanos.
Carlos González, conceyal d'IX de Casu, aseguró na so visita a la Xunta Xeneral, que tendría de tenese en cuenta la situación estratéxica de Casu na comunidá autónoma, tocantes a producción d'enerxía eléctrica y suministru d'agua a tola zona central, anque, a pesar d'ello, sufren grandes dificultaes d'accesu a la banda ancha o a la señal de televisión, o tien problemes de suministru eléctricu y d'atención d'averíes per parte de EDP, como asocedió mientres los primeros díes del argayo. González apuntó qu'amás de la hostelería en Casu hai más colectivos que los hosteleros “seriamente” afectaos pola situación vivida. Ensin dir más allá los ganaderos sufrieron la falta d'alimentación pal ganáu o'l sector de la construcción. González tamién demandó plazos palos arreglos de la carretera de Tarna y pa la d'Arniciu.
Alejandro Alonso, conceyal d'IX en Sobrescobiu, apuntó que, magar ye ciertu que'l gran argayu era difícil de prever, son numberosos los puntos nes turries de la carretera que precisen caltenimientu y revisión, precisamente, pa evitar que finalmente'l dañu sía mayor. El conceyal coyán tamién recuerda qu'un negociu hosteleru y xuna carpintería, amás de ganaderos, viéronse afectaos pol argayo nel so conceyu.
Alonso llamentó les comunicaciones per Internet que sufren, por casu, los vecinos de Soto de Agües, que salen a un mega de velocidá. “Eso sería impensable güei n'otros llugares d'Asturies, ensin dir más allá, n'Uviéu”, alvirtió, non ensin antes llamentar l'abandonu que sufren quien viven nel mediu rural.
Diputáu Autonómicu y Coordinador d'IX
Diputado Autonómico
(Mas Asturies)
Diputada Autonómica
Convocatoria por Asturies