Menu

Ovidio Zapico espera qu'esta sía la primera d'una eliminación total pol peligru que representen pa los habitantes del Altu Nalón

Ovidio Zapico, espresa'l prestu del grupu parlamentariu d'IX pola retirada per parte de Rede Eléctrica Española (REE) d'una torre y el so correspondiente tendíu na redoma del Picu Peruyera, en Llorío, en Llaviana, nel trazáu inutilizáu de Lada-Velilla. Esa foi la torre que sufrió graves desperfectos na envernada de febreru d'anguaño y pa la qu'IX esixera una rápida respuesta na so eliminación porque suponía un grave riesgu pa les persones. IX aportuna y demanda qu'esta sía la primer torre na eliminación total d'ese tendíu de Lada a Velilla.

IX realizó numberoses iniciatives destinaes, per un sitiu a restituyir el paisaxe por que quedara como hai 32 años, antes d'instalar estes xigantesques infraestructures y, por otru, sollertar de los riesgos que supon tener esti gran númberu de fierros y cables, ensin caltenimientu demientres décades. Agora, a lo último escuchen y retiren la torre, pero IX quier qu'esta sía la primera d'una retirada total y definitiva, esplica Ovidio Zapico. “Apura desmantelar tol trazáu porque hai más puntos peligrosos, torres que tán cerquísima de núcleos habitaos y los habitantes del Altu Nalón nun pueden ser rehenes de Rede Eléctrica mientres intenta'l trazáu per otra zona”, alvierte'l diputáu d'IX.Al so xuiciu, dambos tienen de ser procesos diverxentes, porque'l nuevu trazáu Sama-Velilla nada tien que ver cola retirada de les torres. “Ta en xuegu la recuperación ambiental del Altu Nalón y la seguridá de les persones”, sostien.

Agora, cola sintonía ente los dos gobiernos, l'asturianu y el central, ye un bon momentu pa esixir a la FSA y el Gobiernu rexonal que lleguen a un alcuerdu de forma rápida cola nueva Ministra de Transición Ecolóxica, Teresa Ribera, por que proceda dientro de la planificación enerxética al esmantelamientu de Lada-Velilla. “Paez la Ministra bien susceptible en materia ambiental en determinaes temes y esperamos que tamién lo sía pa dar prestu a esta vieya demanda y ver como les xigantesques columnes y los kilómetros de cable son hestoria”, conclúi'l diputáu d'IX.