Menu

La coordinadora d’IX Asturies aprobó güei un resolvimientu sobro transición enerxética e.

La que se refuga de planu una descarbonización exprés según la "atayante oposición a cualquier intentu irresponsable per parte de la Ministra Ribera, adalid del fundamentalismu ecolóxicu, de convertir el qu'ha ser un cambéu de modelu,o enerxéticu paulatín, xustu y equilibráu, dientro del marcu fitu nos Alcuerdos de París, nuna azotada y sópita rotura que nos asitiaría nun escenariu d'incertidume enerxética".

El resolvimientu llega al filu del plenu que se va celebrar el próximu vienres na Xunta Xeneral del Principáu y recueye la posición caltenida a lo llargo de los últimos años por IX Asturies sobro'l sector mineru pero, tamién, el refugu a una descarbonización exprés qu'incluya'l zarru inmediatu de les centrales térmiques.

Pa IX ye imprescindible apangar los efectos del cambéu climáticu y encetar les causes del mesmu pero de forma equilibrada y dando alternatives de futuru a cuenques y territorios que'l so futuru veríase comprometíu si'l procesu realizará de de forma abrupta, condergándolos a la desertización.

IX reclama, amás, compromisu al Gobiernu autonómicu "la configuración d'una alianza política, sindical y ciudadana dientro d'Asturies, coordinada colos representantes institucionales y sociales d'otres comunidaes autónomes y otres rexones europees entamaes en redol a la Plataforma de Rexones Carboneres en Trasición na UE".

El coordinador xeneral d’IX Asturies, Ramón Argüelles, foi especialmente críticu col modelu que trata d'imponese pola nuevu ministra y cuestionó si'l fin últimu d'esti cambéu de modelu pue suponer una apertura del alderique sobro la enerxía nuclear, qu'en dellos países de los que torguen el fin del carbón tán tratando d'impulsar. El dirixente d'IX calificó'l cambéu nel aldu pilotáu pola Ministra Ribera de "unillateral ya irresponsable", pos pretende camudar d'un refundiu un modelu granible que modeló Asturies dende va sieglu y mediu.

España, a xuiciu d'Argüelles, camudó de bandu, alloñase de posiciones como l'alemana y failo averándose a la holandesa y d'otros países del norte onde quier apostase pola enerxía nuclear. Frente a esa posición, Argüelles adelantró qu'IX Asturies asitiarase al pie de les necesidaes de la so población y nun va faer el xuegu a les grandes enerxétiques qu'agora, sol mantu del ecoloxismu, traten de dase una llavadura d'imaxe que nun respuende a los intereses de la ciudadanía sinón de les sos propies cuentes.

La coordinadora monográfica abriola l'Alcalde de Mieres, Aníbal Vazquez, quien, nesta materia, afirmó nun sentise representáu por nengún partíu en Madrid. Claramente enoxáu, el rexidor esixó que la descarbonización faigase ensin cargar de nuevu nos territorios mineros y na so clase trabayadora'l pesu de los cambeos de modelu.

Tamién foi bien crítica la coordinadora nesi condergamientu, Beatriz González Prieto, que recordó que los fondos mineros sirvieren p'ameyorar infraestructures pero que nun fueren abondo pa detener el cayer, polo qu'esixó qu'esta nueva vuelta de tuerca contra les cuenques del carbón llegue con midíes afeutives pa evitar que'l zarru nun sía solo d'un sector económicu sinón de tou un territoriu.

El diputáu Ovidio Zapico foi contundente nel so refugu al zarru de les térmiques y la esclusión del carbón del mix enerxéticu. Al so xuiciu, la descarbonización tien d'enmarcase nos parámetros y feches afitaos nos alcuerdos de París.

Jaime Gareth Florez, secretariu de Converxencia d'IX, enfatizó nos problemes qu'entá antes de la puesta en marcha de midíes de descarbonización exprés amuesen territorios mineros como'l sur occidente asturianos que sufren yá los impactos directos de la llei de transición enerxética con unes escamplaes perdedores: los y les trabayadores de les empreses d'esplotación privaes que sían nuna situación de crisis total.

Pela so parte, l'Alcalde de Morcín y vicepresidente de ACOM, Máximino García, sollertó de que la descarbonización va más allá del zarru de mines y térmiques y que'l so caláu afecta a la mesma estructura del sistema granible, polo que les sos implicaciones, si se caen de forma azotada, puen suponer el colapsu de la economía d'Asturies.