Menu

Reclama un auxiliar educativu nel colexu de Xixón que-y correspuende y evitar segregaciones

La diputada d'IX, Concha Masa, pide al Conseyeru d'Educación, Genaro Alonso, una entrevista pa solucionar el problema d'escolarización que carez Lucas, un neñu con síndrome de Down, al que la Conseyería nun dexa dir al mesmu centru que va la so hermana mayor en Xixón. Concha Masa alvirtió que los hermanos tienen de tar xuntos y que la Conseyería tien de responsabilizase de poner un auxiliar educativu nel centru que-y correspuende, onde yá va la hermana (el colexu Eduardo Martínez Torner) y nun intentar reagrupar a los neños que precisen sofitos nunos determinaos colexos, empezando a ser casi segregaos, dixebraos de la so redolada familiar y del colexu al que-yos correspondería dir.

IX va rexistrar, amás, entrugues orales na Xunta Xeneral, y va siguir la presión” al traviés de los sos representantes nel Conseyu Escolar de Xixón y nel Conceyu, colos que la familia axuntará'l próximu llunes.

La madre de Lucas, Carmen Suárez, recordó que'l problema surde porque la Conseyería nun quier poner un auxiliar educativu nel centru onde yá ta matriculada la hermana d'esti neñu. “Creemos que la Conseyería tien de poner un auxiliar tal como diz la llei, pone-y los sofitos nel colexu que nós escoyemos, nun camudando al neñu del cole o aisllando a tolos neños con necesidaes educatives nel mesmu colexu (onde yá esisten auxiliares educativos) porque lo que se crean son guetos que nun consiguen nin la inclusión nin la integración”, esplicó esta mañana na Xunta Xeneral. Al so xuiciu sería discriminatoriu para'l neñu tener que dir a otru centru distintu al de la so hermana y tamién para ella sería discriminatoriu tener que dexar un colexu para dir al que la Conseyería tresllada al so hermanu.