Menu

Concha Masa y Elsa Abargane reclamen una midida de meyora llaboral, creación d'emplegu y calidá educativa que yá funciona n'Andalucía y Estremadura

IX solicita l'amenorgamientu de la carga llectiva del profesoráu de Secundaria a 18 hores selmanales, como antes de la crisis, y va faer de la meyora llaboral y calidable na educación una de les exes del nuevu cursu políticu. Asina lo punxeron de manifiestu la diputada d'IX Concha Masa y la Secretaria de Política Institucional, Elsa Abargane, na rueda de prensa qu'ufiertaron esta mañana.

La coalición considera que'l Conseyeru Genaro Alonso pue dir dando pasos por que la educación dexe de ser la hermana probe de les cuestiones sociales n'Asturies y dexe de ser un Gobiernu “especialmente fuñe n'inversiones educatives”. Concha Masa alvirtió que la reversión a les 18 hores lectives yá la punxeron en marcha n'Andalucía y n'Estremadura y los cambeos estatales dexen agora más flexibilidá na reversión de los retayos del PP y na Xunta Xeneral yá s'aprobó la xornada de 35 hores selmanales pa los funcionarios públicos. “Nun nos gustaría qu'Asturies fora la última comunidá autónoma en volver a la situación anterior”, dixo la diputada d'IX responsable de los asuntos d'educación nel grupu parlamentariu.

Elsa Abargane, responsable de Política Institucional d'IX, considera que l'amenorgamientu d'hores llectives supon una cuestión bien necesaria porque representa la meyora de les condiciones de trabayu pal profesoráu, amenorgaes pola crisis, dexaría nueves contrataciones y hores pa preparar les clases…, xuntu cola equiparación del profesoráu al d'otres comunidaes autónomes. “Esiximos al Gobiernu asturianu y al central, dambos en manos del PSOE, que cada cual nes sos competencies desenvuelvan los mecanismos pa poner en marcha les 18 hores lectives, porque un gobiernu socialista nun puede quedase al marxe de la recuperación de derechos”, dixo Valle.

Mientres tola llexislatura, IX trabayó na reivindicación de los derechos de los trabayadores pero va reforzar mientres el próximu cursu académicu la demanda de les 18 hores na educación pública. Pa Masa, el Gobiernu de Javier Fernández nun invirtió lo suficiente n'educación. Ye llamativo qu'anguaño nun s'aproveche l'amenorgamientu d'alumnáu pola crisis demográfica pa caltener el númberu de profesores y ameyorar otros aspeutos pindios, como los sofitos a los alumnaos con más dificultaes o la cobertoria de baxes. “Pidimos que'l Conseyeru de pasos yá pa l'amenorgamientu porque lu pue faer programando plantiyes con mayor floxura, en ciertos departamentos o n'otres cuestiones”, esplicó Masa en relación a la demanda de xestos pa explicitar la voluntá de realizar cambeos.

IX rexistró nel parlamentu asturianu delles entrugues pa la so respuesta per parte del Gobiernu asturianu: ¿tien previstu'l Gobiernu recuperar les 18 hores lectives selmanales que teníen los docentes de secundaria y les 23 hores lectives selmanales en primaria nel próximu cursu?. Si nun fuera asina, ¿cuál ye la razón?. Sía que non, ¿qué contactos caltuvo'l Gobiernu d'Asturies col nuevu Gobiernu nacional pa revertir de manera inmediata n'Asturies los retayos establecíos pol Real Decreto-llei 14/2012 de 20 d'abril, de midíes urxentes de racionalización del gastu públicu nel ámbitu educativu y, si ye asina, pa cuándo?.