Menu

Argüelles noma como “bien esmolecedora” la transición enerxética que propón el PSOE

Llamazares demanda un Plan de transición Enerxética, que l'AVE dexe de ser un páxaru y unu financiamientu autonómicu estable que nun enzanque un alcuerdu de presupuestos

Gaspar Llamazares, voceru parlamentariu d'IX na Xunta Xeneral, considera que'l Gobiernu de Pedro Sánchez nun puede quedase na política de xestos y que'l Gobiernu autonómicu precisa lideralgu y compromisu pal fin de llexislatura. El voceru d'IX nel parlamentu asturianu cree que debe d'haber un alcuerdu presupuestariu y políticu por que esti sía un añu decisivu, por culpa de que l'aprobación de la llei de creitu estraordinariu abre la puerta a un alcuerdu. Nesti sentíu, esplicó na Feria Internacional d'Amueses d'Asturies, xuntu al coordinador d'IX, Ramón Argüelles, que la coalición va siguir apostando pol diálogu y la negociación, “para siguir aprobando coses nel BOPA, por qu'ameyoren la situación de les persones”, en palabres d'Argüelles.

Nesti cursu decisivu” para'l cambéu n'Asturies y nel conxuntu del país, como definió Llamazares, el Gobiernu d'Asturies tien d'abandonar la inercia y realizar una defensa de la economía d'Asturies faciendo que l'executivu de Sánchez esclarie la so posición al respective de la política enerxética, les infraestructures y el modelu de financiamientu de les comunidaes autónomes. Al respective de la política enerxética'l Gobiernu central nun puede siguir faciendo pronunciamientos retóricos sinón que tien de presentar un Plan de Transición Enerxética creíble, l'AVE n'Asturies tien de dexar de ser un páxaru” y ser una realidá, al igual que les cercaníes que tán en peligru d'esbarrumbe, y a lo último, debe de presentar un modelu de financiamientu creíble porque nun puede ser que “teamos dando vueltes a una menor financiamientu para'l próximu añu con cargu al IVA” con 70 millones d'euros menos nesti momentu. “Asina tenemos bien difícil la negociación para los presupuestos de la comunidá autónoma con una situación financiera tan inestable”, alvirtió'l voceru nel parlamentu asturianu.

Con respectu al Gobiernu asturianu, IX tien un calendariu lexislativu claru. La primer llei que tien d'aprobase nel mes de setiembre ye la de Tresparencia y Bon Gobiernu, que ye un testu lexislativu de los más avanzaos sobro tresparencia y contra la corrupción, de siguío la Llei de Garantíes de Derechos Básicos, “imprescindible” pa reconocer como derechos suxetivos garantíes habitacionales y contra la pboreza, según establecer un Pactu pola Ciencia y l'Investigación y aprobar la Llei de Memoria Histórica d'IX, yá en tramitación parlamentaria.

Ramón Argüelles alvirtió, pela so parte, que l'enfoque actual de la transición enerxética ye “bien esmolecedor” p'Asturies, yá que non solo representa un zarru antemanáu de les centrales térmiques y consiguientemente ·”echar a la cai a el trabayadores”, sinón que va suponer un encarecimientu de les factures a les cases, col consiguiente perxuiciu pa les persones más sensibles económicamente, y pa les empreses asturianes, les mayores d'elles con una dependencia eléctrica importante na producción, pa les qu'un encarecimientu de la tarifa puede representar que se vaigan de la comunidá. Apostó Argüelles por una transición enerxética razonable.

Per otru llau, el coordinador d'IX, a entrugues de los periodistes sobro les inversiones en depuradores n'Asturies anunciaes por Hugo Morán, Secretariu d'Estáu de Medioambiente, prefier xulgar los fechos a les bones palabres y punxo como exemplu d'estes postreres les continues promeses del anterior Ministru de Fomentu, Iñigo de La Serna. “Cuando tea licitado y en funcionamientu, vamos falar”, atayó.