Menu

Recuerda los finaos y mancaos nel accidente d'Avilés y el llabor del conceyal Javier Ardines

Gaspar Llamazares, voceru parlamentariu d'IX na Xunta Xeneral, repitió nel plenu institucional del Día d'Asturies la ufierta d'IX al diálogu y la negociación pol futuru d'Asturies, n'una efeméride singular d'aniversarios históricos y políticos bien importante, y a la fin d'una llexislatura qu'inda tien xeres por realizar. “Vamos esixir tantu como responsabilidá vamos asumir”, alvirtió'l voceru d'IX qu'empezó'l so discursu amosando les sos condolencies a les families de los finaos nel accidente d'autobús d'Avilés, esperando la puesta recuperación de los mancaos, y al conceyal d'IX, Javier Ardines, asesináu a mediaos d'agostu. Un fechu insólitu en democracia, alvirtió sobro esti postreru, pal qu'esixó “claridá, investigación y responsabilidaes”. “Faemos tamién na figura de Ardines la reconocencia de la política, de los que se comprometen, de la política como l'arte de lo común”, apuntó Llamazares.

Llamazares recordó que nel Reinu d'Asturies hubo lluces y solombres, les lluces en redol a la unidá y al futuru común, y les solombres na dómina escura de los reis folgazanes y les guerres de families. D'esa enseñanza histórica, Llamazares apuntó la necesidá d'evitar les lluches de families y apostar pola unidá. Unidá imprescindible pa encarar los retos d'Asturies: respectu al futuru enerxéticu d'Asturies, cuidando que nun se fala d'una transición ecolóxica, sinón que tamos falando de sustitución y especulación enerxética de les grandes industries, unión pa resolver infraestructures pindies como la Variante de Payares , la supresión del Peaxe del Güerna o la meyora de cercaníes. “Vale la pena exercer la unidá y el proyectu común”, dixo Llamazares. Unidá pa resolver y desbloquiar l'axenda político y lexislativo.

Llamazares tamién apuntó la celebración del aniversariu de la Constitución y del Estatutu d'Autonomía, un testu, el primeru, qu'IX quier reformar pero que reconoz como mesmu porque foi frutu de lluchadores franquistes y democráticos y el segundu entamáu tamién con diálogu y negociación. “Nellos el diálogu, la cesión y l'alcuerdu fueron fundamentales”, repitió.

Nesti tramu final de llexislatura, IX va priorizar nel parlamentu asturianu la llei de Derechos Vitales Básicos, tamién la de Tresparencia y Bon Gobiernu y la Llei de Memoria Histórica. Al pie de estos proyectos lexislativos tán los políticos: prorrogar l'alcuerdu cola universidá y la investigación y el desenvolvimientu de l’área central d'Asturies, “dos elementos esenciales”.

Llamazares finó col futuru d'Asturies, que trespasa urxencies y coyuntures. Nesi sen, el voceru d'IX, sorrayó que trataríase de la reforma electoral pa meyorar la calidá de la democracia, d'una reforma del estatutu pa facer reconocencia de los derechos de los falantes cola cooficialidá y de garantizar tamién los derechos sociales con un modelu anovau de financiamientu autonómicu.

El plenu institucional del Día d'Asturies empezó con un minutu de silenciu n'alcordanza de les cinco víctimes del accidente de Alsa n'Avilés, colos diputaos puestos de pies.