Menu

IX sofita la declaración institucional que refuga'l zarru de la planta avilesina y solicita a la dirección de la empresa que rectifique la decisión, amás de sofitar a los trabayadores

Gaspar Llamazares, voceru parlamentariu d'IX na Xunta Xeneral, aseguró esta mañana antes del plenu sobre Alcoa que desgraciadamente les amenaces concretáronse nel anunciu de zarru de la factoría de Alcoa n'Avilés. La Xunta Xeneral respuende de forma unitaria refugando'l zarru, dixo Llamazares, pero tamién señaló que más allá de too eso ye necesario qu'esti frente común en defensa de la industria ampliase al conxuntu de la industria asturiano y que, más allá d'eso, reclamar al Gobiernu español dalguna política industrial.

A xuiciu de Llamazares ta en riesgu la industria asturiano y la política industrial española. Pa recuperala ye necesariu un frente común que vaiga más allá de lo que güei concretamos na Xunta Xeneral, qu'incluya a les fuerces polítiques de la Xunta Xeneral, y tamién a les organizaciones sindical y empresarial pero tamién reclame del Gobiernu central una política industrial que, a lo menos, avere la nuesa industria a los mandatos europeos, alvirtió Llamazares. “Inda tamos llueñe anque n'Asturies tengamos una potente industria en riesgu”, concluyó.

Los diputaos d'IX sofitaron esta mañana la declaración institucional promovida nel Parlamentu asturianu que, de primeres, refuga'l zarru de la planta avilesina d’Alcoa y solicita a la dirección de la empresa que rectifique la so decisión. Apela a los responsables de la compañía por que demuestren el so compromisu col Principáu d'Asturies. Coles mesmes, manifiesta la so oposición al venir de la compañía, qu'en momentu dalgunu avisó de les sos intenciones.

Nel segundu puntu consensuáu con tolos grupos políticos la Xunta Xeneral encamienta y sofita al Conseyu de Gobiernu por que, nel exerciciu de les sos responsabilidaes, tome toles iniciatives necesaries ante la dirección d’Alcoa por qu'arrenuncie de la clausura de la factoría d'Avilés. L'impactu d'una midida tan negativa, que traería la perda inmediata de más de 300 emplegos directos, supondría un duru golpe pal puxu industrial d'una cuenca onde la factoría ta enraigonada dende hai más de mediu sieglu.

El terceru encamienta al Conseyu de Gobiernu a esixir la intervención inmediato y urxente de los Ministerios d'Industria y de Transición Ecolóxica pa revertir l'anunciu de la dirección de Alcoa sobre unes instalaciones que constitúin tou un referente mundial tocantes a la calidá de la producción.

Nel cuartu tresllada'l so sofitu y solidaridá a la plantiya d’Alcoa y les sos families y a les persones afectaes pol anunciu de la multinacional. Fai estensivu'l so respaldu a los y les trabayadores de la planta d'A Coruña.

Nel postreru de los cinco puntos la Xunta Xeneral encamienta al Conseyu de Gobiernu a lliderar, ante'l Gobiernu d'España, les midíes alcordaes por esta Xunta Xeneral en favor del caltenimientu de la industria metalúrxico española, y n'especial d'Asturies.