Menu

Concha Masa, diputada d'IX na Xunta Xeneral, punxo de manifiestu esta mañana nel plenu de la Xunta Xeneral la esmolición de la coalición pola medría de locales d'apuestes na comunidá autónoma lo que xeneró cierta alarma social ente les asociaciones qu'enceten la ludopatía.

Masa, quien reconoció que'l problema n'Asturies nun ye similar al d'otres comunidaes como pue ser Madrid, sí convidó al Conseyeru a nun quedase nel prestu de desenvolver normes y programes sinón que-y riquió estremar el precuru y la prevención por que les ciudaes asturianes nun acaben como la capital del estáu. “Tenemos necesidá de tomar midíes, desenvolver programes, estremar midíes preventives y llevar a cabu la evaluación permanente de les midíes qu'esisten”, dixo Masa mientres el cursu del so interpelación al Conseyeru de Presidencia.
 
La diputada d'IX recordó a Guillermo Martínez la gran voracidad de les cases d'apuestes y la responsabilidá del Principáu de velar poles poblaciones más vulnerables y sobro moces y menores. Tamién alvirtió que los ingresos fiscales pol xuegu puede ser una cuestión importante pero tamién lo sería que una bona proporción d'esos ingresos reviertan en midíes de prevención.
 
Pela so parte, Guillermo Martínez apurrió los datos del sector n'Asturies: un casino en Xixón con sala apéndice n'Uviéu, seis bingos, 22 salones de Xuegu y 6 locales d'apuestes dirixíos por 130 empreses, 3 más qu'en 2016 y 830 emplegos, amás de 27 millones d'ingresos. El Conseyeru embrivió'l riesgu y aludió a la restrictiva y garantísta llei del xuegu y a que n'Asturies nun hubo una crecedera escomanada, sinón de dos locales. Negó la “proliferación” de cases d'apuestes y que l'adicción afecte más a los sectores más vulnerables. Sicasí, aseguró que ta previstu un cambéu de la llei pal control de DNI efectivu en tolos locales d'apuestes y de xuegu.