Menu

La eurodiputada d'IX visita per segunda vegada a los trabayadores y pide la nacionalización de la empresa

Ángela Vallina, diputada d'IX nel Parlamentu Européu, reclamó güei a les puertes d’Alcoa que'l Gobiernu de la nación “pase de les bones palabres a los fechos, tome nota y busque una solución” énte'l zarru anunciáu de la factoría. A xuiciu de la diputada europea una de les soluciones podría ser que'l Gobiernu nacionalice la empresa tal como se fixo n'Italia. “Nun podemos dexar un zarru, alvirtió Vallina” en axuntándose per segunda vegada colos miembros del comité d'empresa d’Alcoa y trabayadores. La eurodiputada d'IX amosóse acordies col exemplu puestu pol tamién eurodiputáu Edouard Martin –presente na visita al pie de la diputada de Podemos Tania González- que rellató a los trabayadores, representaos pol so comité d'empresa, qu'en Francia hai una llei qu'implica que cualquier empresa que quiera dise de Francia tien la obligación de vender, nun cerrar. “Hai exemplos bonos n'otros países y creo qu'España tendría de copiar, sobremanera si ye un Gobiernu que diz que defende a los trabayadores y estrémase del anterior Gobiernu”, dixo Vallina na so segunda visita a trabayadores d’Alcoa.

José Manuel Gómez de la UZ presidente del comité d'empresa reclamó al Gobierno sensibilidá pa revertir l'anunciu de zarru de la multinacional, porque Asturies quier industria, como se demostró na manifestación d'ayeri. González de la UZ reconoció l'ésitu de la manifestación pero tamién alvirtió de que los trabayadores a partir del día 1, de nun modificar Alcoa la decisión, van tar despidíos. “El Gobiernu tien de llevantar esti espediente de zarru y dexase d’andar poles cañes con tarifes y compradores. A mi nun me consta nengún contactu a altu nivel con Alcoa. El Gobiernu tien ferramientes y si hai qu'intervenir Alcoa interviense, pero hai que faelo yá”, esplicó'l presidente del comité d'empresa.