Menu

La diputada d'IX considera al asturianu núcleu vital de la identidá y alvierte de la necesidá de la pervivencia de la llingua a pesar de los votos en contra de PSOE, PP, Ciudadanos y Foru

Los votos de los diputaos d'IX y Podemos nun fueron abondo p'aprobar tomar en considerancia la Proposición de Llei de Reforma de la Llei orgánica 7/1981 de 30 d'avientu, l'Estatutu d'Autonomía, pa declarar la cooficialidá del asturianu y del gallegoasturianu al refugar la propuesta PSOE, PP, Ciudadanos y Foro Asturies. La diputada d'IX, Concha Masa, considera sicasí, un pergrande pasu adelantre esti que güei da la sociedá asturiana nel llargu camín de defensa de la llingua. "Tamos seguros, amás, de qu'ésti ye solo'l primer pasu, anque la resultancia de la votación nun sía abondo pa empezar el procesu de reforma estatutaria, vamos siguir sumando fuerces hasta consiguilo", esplicó na tribuna d'oradores de la Xunta Xeneral, y recordando "arguyosos" el respaldu social que nos emburria" citó a Galiléu: "y sicasí, muévese".

En declaraciones a los medios al términu del puntu del orde del día, Masa repitió'l prestu d'IX por traer l'alderique a la cámara dempués de tantos años reivindicando la oficialidá del asturianu. "Ye un pasu adelantre y esperamos que nun futuru curtiu pueda plantegase la reforma estatutaria y aprobase la cooficialidá. Sabemos que los procesos van adulces pero qu'antes o dempués la cooficialidá va llegar", aseguró la diputada d'IX.

Pa la diputada d'IX la reforma del estatutu para la cooficialidá ye un alderique sobre un elementu nuclear de la nuesa comunidá, la llingua propia. L'asturianu, la Llingua asturiana, al igual qu'otres llingües propies d'otres Comunidaes Autónomes, ye núcleu vital de la nuesa identidá, ye una potente creación colectiva del pueblu asturianu, alvirtió la diputada d'IX. "Xúnenos col pasáu del nuesu pueblu, porque d'él recíbese como patrimoniu vivu, y va xuninos col so futuru, porque la recibirá de nós como mandáu d'identidá común." Asina lo reconocen siquier n'otres Comunidaes Autónomes con una segunda llingua oficial y afigurar nos sos propios Estatutos. "¿Por qué tenemos de ser inferiores en Asturies?", preguntóse.

"Nestos momentos nos que les señes d'identidá tán acomuñándose, torticeramente, colos separatismos, en Asturies podemos reivindicar con toa llexitimidá les nueses señes d'identidá propies, nel contestu d'un Estáu de les Autonomíes, compactu, pero cola so diversidá. Y sentinos bien arguyosos d'ello", esplicó énte les crítiques de partíos y movimientos de derecha y estrema derecha.

Utilizando les palabres de George Steiner, reconocíu como unu de los pensadores más acreditaos del nuesu tiempu, Masa remató'l so discursu falando de la relevancia ya importancia de la supervivencia de les llingües. "Cuando muerre un idioma, muerre con él un enfoque total -un enfoque como nengún otru- de la vida, de la realidá, de la conciencia. Cuando un idioma ye esfarrapáu o reducíu a la inutilidá pol idioma del planeta, tien llugar un amenorgamientu irreparable nel texíu de la creatividá humana, nes maneres de sentir el verbu esperar. Nun hai nenguna llingua pequena. Delles llingües del desiertu del Kalahari tienen más matices sobre'l conceptu de futuru, del suxuntivu, qu'aquellos de los que disponía Aristóteles. Llueñe de ser una maldición, Babel resultó ser la base mesma de la creatividá humana, de la riqueza de la mente, que traza los distintos modelos de la esistencia. De manera inclusive más drástica que la destrucción actual de la flora y de la fauna, la desapaición deles llingües humanes -calcúlese que podríen quedar unes cinco mil de les venti mil qu'esistíen va poco- amenacia con vulgarizar, con estandarizar los recursos internu y social de la raza humana. Por tanto, nun cónstame qu'haya un problema más urxente qu'el de la preservación del don de llingües del Pentecostés, el de la défense et illustration, por usar una espresión conocida del Renacimientu, de cada idioma ensin escepción, por bien reducíu que sía'l númberu de los sos falantes, por bien modesta que sía la so matriz económica y territorial. Aprender un idioma, lleer los sos clásicos, contribuyir a la so supervivencia, anque sía en midida modesta, ye ser más qu'ún mesmu."

Masa recordó tamién el trabayu realizáu a partir de febreru de 2016, y mientres más d'un añu, nesta Xunta Xeneral, por iniciativa del nuesu Grupu Parlamentariu, nuna Comisión Especial, la Comisión Especial d'estudiu sobre'l réxime de protección y promoción del Asturianu y les sos distintes alternatives. Por ella desfilaron más de 40 comparecientes, espertos de tolos ámbitos rellacionaos cola Llingua (académicos, artistes, empresarios, representantes d'asociaciones ciudadanes...). "Toos coincidieron nun diagnósticu común d'esmolición sobre'l riesgu de desapaición de la Llingua si nun s'adopten de manera inmediata, o siquier al curtiu plazu, midíes pa la so protección, tresmisión y aprendizaxe".

Por eso, na propuesta del Dictame, incorporóse la siguiente frase:

La Comisión, teniendo en cuenta la situación descrita enantes y llargamente respondida pola xeneralidá de los comparecientes, constata la necesidá d'empecipiar nel más curtiu plazu posible un procesu de reforma del Estatutu d'Autonomía d'Asturies que, acordies con la solución constitucional prevista para baltes casos, lleve a la co-oficialidá del asturianu nel Principáu (incluyendo tamién la del eonaviego o gallego-asturianu nel so ámbitu) como únicu camín válidu para garantizar de manera plena la so protección y promoción para caltener con posibilidaes de futuru'l nuesu patrimoniu llingüísticu.

Sicasí, cuando llegó'l momentu d'aldericar el Dictame, la diputada apuntó que se dio cuenta aína de qu'equí'l métodu científicu, pol que se deducen unes tesis por aciu un razonamientu lóxicu y rigorosu a partir de los datos llograos de la esperimentación, rellumaba pola so ausencia. "Dempués de tool trabayu realizáu, dellos Grupos Parlamentarios caltiénense nes sos posiciones predeterminaes ensin atender a les evidencies nin a les prebes, faciendo honor al Tribunal de la Inquisición que xulgó a Galiléu Galilei", sorrayó.