Menu

Ramón Argüelles, Gabriela Álvarez y Juan Ponte axuntáronse güei con representantes del colectivu qu'esixe que se cumplan los Alcuerdos d'Uviéu, que prevíen la so incorporación n'otres empreses auxiliares.

Izquierda Xunida esixó güei que se cumplan los Alcuerdos d'Uviéu pa dar respuesta al colectivu de trabayadores de MONTRASA que, dende va dellos años, tán pindios de la so recueya y d'unes indemnizaciones que nun lleguen a pesar de les distintes sentencies xudiciales que, una tres otra, reconociéron-yos los sos derechos. El coordinador xeneral d'IX, Ramón Argüelles, llamentó qu'inda non se llegó a una solución satisfactoria. “Son 30 persones que siguen ensin puestu de trabayu, que siguen ensin reconocer los sos derechos; qu'hai unos alcuerdos, Alcuerdos d'Uviéu roblaos pol Principáu d'Asturies onde se recoye a los escedentes d'esti sector y que tampoco los lleven a cabu y qu'hai unes sentencies millonaries que tampoco se faen efectives. Yo nun sé lo qu'hai que faer yá nesti país por que los tribunales dicten sentencies y daquién les cumpla”.

Argüelles axuntó esta mañana, al pie de la secretaria de Política Municipal, Gabriela Álvarez, y el secretariu d'Acción Política, Juan Ponte, con trabayadores de MONTRASA que traten de que, d'una vegada por toes, póngase fin al conflictu.

El voceru del colectivu, Ricardo Martínez, amosó la so esmolición pola nuevu fase que se abre y que supondría la lliquidación de la empresa: “Too por culpa d'ella (en referencia a la compañía), porque a naide asocédese-y faer una quita del 90% de la delda que nos debe, de 15 meses, una espera de dos años y depués páguente esi 10% en 8 años. Eso paezme que cualesquier ser humanu diz que non. Enriba, ensin garantizate'l puestu de trabayu”.

Martínez enfatizó que nun quieren nin pretenden que la empresa vease empuesta al zarru. “Nun queremos que 90 persones que tán ende puedan perder el so emplegu por culpa d'esto. Esto ye bien bono de iguar: el Gobiernu del Principáu d'Asturies tiense que comprometer, igual que'l Gobiernu de la nación comprometer colos nuesos compañeros de ALCOA, a buscar una solución pa esti colectivu, y recolocarlos colos pactos d'Uviéu. Lo que tendría que ser yá dende'l 5 d'abril del 16. Se nos recoloca nes empreses auxiliares y acabóse el problema y nun hai que cerrar nada”.

Ricardo Martínez alvirtió del peligru real de que MONTRASA termine con un pufu de 2,8 millones d'euros, la metá a les entidaes públiques y l'otra metá a los trabayadores despidíos. “Hai que dexar dambes partes y nós tamos dispuestos a vencer”, concluyó.