Menu

La iniciativa d'IX foi sofitada por unanimidá por tolos grupos políticos

La Xunta Xeneral reclama que los médicos MIR de la especialidá de Medicina Familiar y Comuñal vuelvan a los hospitales de Xarrio, Cangas y Les Arriondes. Asina lo esixeron esta mañana tolos grupos parlamentarios sofitando una Proposición Non de Llei d'IX que la diputada Marta Pulgar argumentó sobro la necesidá de tomar en serio la importancia de los hospitales comarcales, potencialos y da-yos un conteníu prácticu, amás de la meyora profesional nesti ámbitu. “Perder la docencia tien una repercusión negativa tantu na calidá asistencial como pa los profesionales y los usuarios”, esplicó Pulgar.

A xuiciu de la diputada d'IX, Xarrio, y n'estensivu los hospitales de Cangas y Les Arriondes, cumple tolos requisitos pa la acreditación como centru Docente Mir en Medicina Familiar, sacante nel númberu de partos, anque añedió, en referencia al avieyamientu poblacional asturianu, “si lo desdexamos nun lo vamos cumplir tampoco nel restu”. Pulgar alvirtió que ye consciente qu'hai que cumplir la llei pero pa salvar esti requisitu, por casu, podría cuntase cola coordinación ente hospitales. Cola coordinación asistencial, como yá se fai pa otres cuestiones ente l'Hospital de Xarrio y el d'Avilés, cumpliríense los númberos necesarios. “La rotación que podría faese sería tamién una riqueza pa la formación de los profesionales”, dixo.

El testu aprobáu esta mañana ye'l siguiente:

1º.- Adoptar les midíes organizativas, dotacionales y funciones necesaries pa cumplir los requisitos esixíos na Orde PRE/861/2013, BOE de 18 de mayu de 2013 de acreditación d'Unidaes Docentes, coles mires d'aprovechar el potencial de toes y cada una de les árees sanitaries na formación de los MIR de Medicina Familiar y Comuñal, contribuyendo ensin dulda a la meyora de la calidá asistencial y la potenciación de los hospitales comarcales de Xarrio, Cangas y Hospital del Oriente.

2º.- Solicitar de nuevu al Ministeriu de Sanidá la concesión de docencia pa Médicos de Familia, nos Hospitales de Xarrio, Cangas y Hospital del Oriente.