Menu

Ángela Vallina llama al restu de fuerces a incluyir na "axenda política" la necesidá de llograr la máxima reconocencia pal idioma vernáculu

Izquierda Xunida va impulsar como prioridá la oficialidá del asturianu de cara a la próxima llexislatura, na que tamién, como pasu previu, pretende reforzase alministrativa y xurídicamente l'Academia de la Llingua. La eurodiputada y candidata d'IX a la Presidencia del Principáu, Ángela Vallina, y el presidente de l'Academia, Xosé Antón González Riaño, falaron güei de les exes imprescindibles pa llograr la promoción del asturianu, y que tienen que dexar un mayor usu de la llingua vernácula en tolos ámbitos, dende l'audiovisual al educativu. Vallina llamó al restu de fuerces a empecipiar tamién l'alderique: “Interésanos poner na axenda política la tema de la nuesa llingua: creo que los demás partíos y fuerces qu'opten al Gobiernu d'Asturies deberíen tamién ponelo na so axenda política. Va siendo hora”.

L'arranque d'esta fueya de ruta, esplicó Vallna, tien qu'empezar per “afitar l'estatus xurídicu y alministrativu de l'academia, que ye preautonómicu, y siguir nel trabayu hasta consiguir d'una vegada por toes la oficialidá”.

González Riaño aseguró, tres l'alcuentru, qu'esistía un altu grau de coincidencia nos planteamientos d'IX respecto al asturianu, daqué que, dixo, “nun ye una novedá”

Nós lo que plantegamos ye lo que denomamos exes pa la política llinguística que Asturies precisa a curtio y mediu plazu y, en esti sentíu, pos tuvimos un intercambiu d'impresiones, a la mio parezme que bien positivu, nuna llinea, dende llueu de muncha converxencia tocantes a los planteamientos que la llingua y la cultura de Asturies precisa p'afitase definitivamente”.