Menu

Zapico esixe “un pocu d'humildá” a Adrián Barbón cuando diz que los sos adversarios nun tán capacitaos pa gobernar.

El númberu dos d'IX demanda a PSOE y Podemos un pronunciamientu sobro los pactos postelectorales.

Ovidio Zapico, diputáu d'IX y candidatu númberu dos d'Asturies pola Izquierda, amosó la so decepción énte les palabres d'Adrián Barbón diciendo que los sos adversarios nun tán capacitaos nin siquier pa gobernar nin comunidaes de vecinos y esixó-y un pocu d'humildá”. “IX lleva díes tendiendo la mano pa gobernar, pero si la so respuesta va ser esa, a mi esmolezme, cuando somos una fuerza que demostremos nos conceyos onde gobernemos que tamos abondo capacitaos pa gobernar”, alvirtió Zapico en presencia del alcalde de Mieres, Anibal Vázquez, mientres la visita al polígonu de La Cuadriella, en Mieres. De siguío, l'actual diputáu, sostuvo que Anibal equí en Mieres ye un bon exemplu de lo que digo, “Anibal ta capacitáu pa gobernar munches comunidaes de vecinos, más de les qu'Adrián gobernó hasta la fecha”.

Ovidio Zapico tamién amosó la so esmolición énte'l silenciu del PSOE y tamién de Podemos énte la nuesa insistencia de buscar diálogos y alcuerdos. Zapico señaló qu'a la otra fuerza de la izquierda, “nun los oyimos nada en tola campaña” y queremos saber si van siguir la sienda qu'empecipiaron va cuatro años en Xixón dexando gobiernos de la derecha o si prefieren siguir la sienda de los postreros cuatro años n'Asturies bloquiando cualquier posibilidá d'entendimientos fuertes na izquierda asturiana Los partíos, dixo, “tenemos de dicir qué pensamos de les aliances postelectorales porque los tiempos del bipartidismu termináronse”.

El númberu dos d'IX a la Xunta Xeneral candidatu númberu dos d'Asturies pola Izquierda, tamién esplicó qu'aquellos gobernantes que tienen la responsabilidá de dirixir el procesu de descarbonización tienen la obligación de llograr una transición enerxética ordenada y, sobremanera, xusta colos territorios. “La descarbonización nun puede dexar tres de sigo pandoriales, polígonos industriales, pueblos ensin guah.es nin valles, como'l de Turón, ensin vida”, clamó l'actual diputáu. Coles mesmes, demandó “esixencia del futuru gobiernu d'Asturies” énte'l Gobiernu central. Nesti sentíu lazó un mensaxe al candidatu socialista, Adrián Barbón. “N'IX nun nos fiamos de la capacidá d'incidencia que tenga la FSA nel Gobiernu de Sánchez, porque lo vimos, fueron incapaces d'aprobar l'estatutu de la industria electrointensiva asturiana”. Nun creemos a Adrián Barbón, dixo Zapico, cuando diz que cola FSA yá hai representación nel Gobiernu de Pedro Sánchez. “La representación, la capacidá d'influencia énte gobiernu de Pedro Sánchez solo dir a poder exercer un gobiernu de la izquierda plural, fuerte”, concluyó.

Anibal Vázquez, candidatu de Mieres pola Izquierda a l'alcaldía, propunxo esta mañana, al pie de Ovidio Zapico, dedicar les naves del polígonu de la Cuadriella, en Turón, a crear naves nido o ampliar les instalaciones del institutu de la localidá. L'alcalde, que visitó'l polígonu onde s'allugaba Diasa, recordó que Turón ye posiblemente unu de los territorios más castigaos de la reconversión minera .

Nel so momentu, dixo l'alcalde, había miles de puestos de trabayu y agora nun hai prácticamente nenguna actividá económica de caláu. “Paecía que col funcionamientu de Diasa, una empresa de fabricación de melecines tendría futuru, pero foi un auténticu fracasu y agora tenemos un polígonu que les sos naves tán en manos de los bancos”, esplicó'l candidatu acompañáu de los miembros de la candidatura local. Vázquez tamién esplicó que faló en munches ocasiones cola Conseyería pa recuperar estes naves y poner naves nido por que vuelva l'actividá, que los empresarios tengan un cachu de nave col que realizar actividá y crear empléu. Agora, siguió, tán en manos de cinco bancos, ensin actividá, en fín, “un polígonu muertu de risa”. Otra de les posibilidaes según l'alcalde ye reutilizar delles naves p'ampliar la formación del Institutu de Turón, agora que se vuelve vistir a la formación profesional. “Taría al llau del institutu y sería una manera de completar la formación nel institutu”, esplicó.