Al navegar por esta web acepta la utilización de cookies para análisis y personalización
Saber más    

Noticies Toles noticies d´IX

12/07/2019

IX da'l so sofitu a la investidura de Barbón y pide al candidatu a la Presidencia una Conseyería específica de Cultura

Ángela Vallina reclama'l fin del frentismu pa favorecer pactos que dexen dar respuesta a les necesidaes reales d'Asturies

La vocera d'IX na Xunta Xeneral del Principáu, Ángela Vallina, anunció fai apenes unos minutos el sofitu de la formación a la investidura del socialista Adrián Barbón como presidente d'Asturies. La parllamentaria fuxó de la retórica y yá al arranque de la so intervención esplicó que'l votu diba ser favorable y reclamó la creación d'una Conseyería Específica de Cultura pa la xestión del ricu patrimoniu asturianu y el nuevu escenariu que se va abrir pa la llingua. El sofitu yera conocíu yá que, tres selmanes de negociaciones, dambes fuerces apautaren una declaración conxunta que recoyía, nun documentu de mínimos, dalgunes de les prioridaes que comprometíen al futuru gobiernu.

El sofitu realízase pa la investidura yá que, de cara a la estabilidá al Gobiernu mientres la llexislatura, queda pindia de nueves negociaciones ente IX PSOE, nel que pretende avanzase un programa más concretu y ambiciosu. Asina lo esplicaba Ángela Vallina tres la so intervención nel Plenu: “Taba claro qu'IX yá decidiera'l votu a favor de la investidura porque llogremos una declaración coles temes más importantes de cara a la llexislatura, los más acuciosos d'Asturies, pero hai'l compromisu, y güei ratifícase, de siguir axustando por que esti alcuerdu sía muncho más ampliu y sía un alcuerdu de llexislatura”.

Sía que non, la situación de la Comunidá Autónoma rique d'un cambéu nes estratexes polítiques pa poner fin al frentismu y la crispadura. “Esti ye'l camín que precisa Asturies pa solucionar los sos problemes y nun precisamos más yá la política del frentismu, d'enfrentase unos con otros, de faltase. Si tamos toos d'alcuerdu nel diagnósticu que tien Asturies , dexemos el frentismu, apautemos, dialoguemos y saquemos a Asturies d'esta situación”.

Na so intervención, Ángela Vallina reclamó la creación d'una Conseyería específica de Cultura pa encetar col máximu refuerzu políticu la xestión del ricu patrimoniu históricu, arqueolóxicu, industrial, pero tamién cola enorme tradición n'artes escéniques, ópera, artes plástiques o audiovisuales que, enfatizó la diputada, tienen de ser xestionaes entendiendo que formen parte d'una industria, la cultural, na qu'Asturies puede ser una referencia más allá de les sos propies fronteres.

IX reclamó al futuru presidente que priorice les polítiques d'emplegu ya industriales como elementos estratéxicos que, amás, puedan sirvir pa dar respuesta a los retos demográficos. Parar l'avieyamientu de la población y l'éxodu xuvenil esixe, a xuiciu de Vallina, un mercáu llaboral incluyente y con contratos calidable.

Ángela Vallina desveló que, mientres les negociaciones pa la firma de la declaración d’investidura IX propunxera la creación d'un departamentu específicu encargáu de buscar y encargase de les llínees de financiamientu de la Unión Europea y, estimó, que Barbón recoyera “el guante”, col anunciu d'una Dirección xeneral. “Na Unión Europea hai financiamientu si sabe buscase”.

La vocera d'Asturies pola Izquierda llamó l'atención nel Plenu de la difícil situación pola que pasen empreses como Alcoa y otres como Zener, que so plantiya, dixo, ta güei en Vizcaya pa reclamar frente a Euskaltel que garantice'l futuru de la plantiya a partir del 31 d'avientu. La entidá, instaladora de Telecable, ve apeligrar agora la so actividá yá que, tres la vienta al grupu vascu de l'antigua operadora asturiana, nun s'esclarió hasta agora si va respetar al personal (90 persones) que por más de 20 años foi l'encargáu de les instalaciones de cable n'Asturies.

Volver

Compartir

2014 Izquierda Xunida d'Asturies - Política de privacidad - Política de cookies