Menu

Ángela Vallina axuntóse güei con representantes del colectivu que denuncien la falta de previsión dende hai casi dos décades.

Izquierda Xunida va pidir al Gobiernu qu'esplique la situación del serviciu d'intérpretes pal alumnáu sordo y que, nestos momentos, nun ta garantizáu más allá del dos d'ochobre. La vocera de la formación, Ángela Vallina, axuntóse esa mañana con representantes del colectivu, quien denunciaron la falta de previsión del Principáu.

Vallina reprochó que nun se tuvo la previsión de tener el serviciu yá contratáu definitivamente pa tol cursu ya, inclusive, nuna planificación a más llargu plazu qu'un añu vista. “Fixeron un contratu menor agora, lo cual demuestra la falta de planificación y les consecuencies tamién de les privatizaciones”. Y ye que la mediación comunicativa ya interpretación de la llingua de signos con destín al alumnáu sordo empréstase al traviés de servicios esternos, ayenos a la Conseyería d'Educación, dende hai casi dos décades, cuando empezó a ufiertase esta atención complementaria nos colexos, tantu públicos como alcordaos.

Pa la vocera d'IX, l'atención a esta discapacidá tendría que ser, enfatizó, “una de les coses que la escuela pública curiara con absoluta exquisitez. Paez ser que primen otros intereses y nun se fixo los deberes con un personal que tendría de ser público y que tendría que tener una planificación”.

Como voceru de los intérpretes, David González, amosó la so esmolición porque, “a día de güei, inda nun tenemos garantizáu que l'alumnáu sordo pueda cuntar con esti recursu más allá del día 2 d'ochobre”.

Nestos momentos, el serviciu empresta atención a 26 alumnos que son los únicos que tienen reconocíu'l derechu a esta prestación y a 22 trabayadores (15 fixos discontinuos y 7 eventuales”.