Menu

Zapico reclama garantíes pa recuperar la percepción con rapidez y sueldos cimeros al SMI paquien s'incorpore a trabayos apareyaos a la prestación.

Izquierda Xunida pidió güei al Gobiernu d'Asturies cambeos p’ameyorar la eficacia na prestación del Salariu Social, con una mayor axilidá na so concesión y xestión pero, tamién, con midíes que dexen ufiertar a los sos perceptores programes llaborales amestaos a nuevos nichos del denomináu “emplegu verde” y que sería posible al traviés de los programes d’erradicación d'especies alóctones como la cortaderia selloana (plumeru de Pampa). El diputáu Ovidio Zapico preguntó a la conseyera de Derechos Sociales y Bienestar Social, Melania Álvarez sobro los cambeos que pretende enllantar nel modelu de Salariu Social.

Pa Ovidio Zapico hai una oportunidá que tien d'aprovechase en materia d’emplegu verde como una vía d'incorporación llaboral pa persones beneficiaries del Salariu Social. Eso sí, esa incorporación tien de realizase con garantía d'unos ingresos cimeros siquier al SMI y de recuperación de la prestación si a la fin d'esos contratos la situación de vulnerabilidá persiste.

Na so intervención, el diputáu d'IX celebró que se reconoza'l calter indiscutible del Salariu Social como “derechu suxetivu” y que se plantege la creación d'un programa d'empléu verde social dientro del marcu de la Concertación.

Ente les prioridaes, Zapico aprofió la necesidá d'entainar la nueva Llei de Derechos Vitales y, sobremanera, del blindaxe d'un sistema públicu que garantice que les persones más vulnerables puedan beneficiase d'una protección imprescindible p'asegurar unes condiciones mínimes pa una vida digna.

El parllamentariu apuró a la busca d'alcuerdos y reprochó el despropósitu” de los últimos meses énte la falta d'entendimientu nel tableru políticu nacional que, dixo, nun tenía de volver a repitise.

N'Asturies, sí qu'hai, a xuiciu de Zapico, espaciu p'amplios consensos. Nesta dixo, en materia de polítiques sociales ye bien fácil atopar, ente los distintos grupos parlamentarios la exa del alcuerdu: “aquellos grupos parlamentarios que cuando se fala d'esta partida económica definir como gastu social nun pueden tar na exa del alcuerdu d'aquellos otros grupos parlamentarios que, cuando falamos d'esta partida económica, definir como inversión social”. Por ello, reivindicó que les fuerces progresistes lideren les polítiques sociales n'Asturies porque la falta d'entendimientu llevaría a quien nun defenden nin a les capes más vulnerables de la población nin a la clase trabayadora a marcar les pautes d'actuación. “Por qu’esto nun asoceda tenemos que nós, qu'amás somo más, somos munchos más, garantizar esa exa d'alcuerdu”.