Menu

Ángela Vallina tresllada al presidente la urxencia pa un calendariu que dexe alcuerdos amplios pa la defensa de los intereses d'Asturies en Madrid y Europa y la implicación de los Conceyos en xestión de llínees pa la reconstrucción pero tamién pa la reforma de l'alministración

Izquierda Xunida esixó güei al presidente d'Asturies, Adrián Barbón la constitución d'una "Mesa pola Industria" como prioridá insoslayable pa buscar alternatives que dexen superar les torgues del procesu de transición enerxética pero tamién a los nuevos retos surdíos tres la COVID-19, por aciu un gran bloque que faiga fuerza dientro de la Comunidá Autónoma pero tamién en Madrid y énte Europa. La vocera parlamentaria de la formación, Ángela Vallina, mientres la so intervención nel Alderique d'Orientación Política, unvió al xefe del executivu autonómicu un claru mensaxe na urxencia pa dar pasos que terminen cola inercia de gobiernos anteriores nun momentu nel que, recordó, consumióse un terciu de la llexislatura. "Empecipiemos d'una vegada el procesu políticu en materia industrial. Tengamoslu apautáu, antes de l'aprobación de los presupuestos, un mapa d'actuaciones qu'hemos defender equí y nel conciertu estatal. Afitemos güei equí l'arquitectura d'esi procesu que tien d'incluyir a los axentes sociales. Asturies precisa más fuerza y guarda que la qu'anguaño tenemos nel Congresu de los diputaos onde fuerces particularistes conservadores pueden faenos enforma dañu. Xeneremos un marcu políticu de reivindicación y esixencia que tamién venceye a los nuesos representantes nes Cortes y dóte-yos d'un respaldu que puedan utilizar. Reforcemos la nuesa voz en Madrid".

Pa IX, esplicó Vallina, fai tamién falta reactivar l'Alianza poles Infraestructures, con un cronograma y una axenda de revindicación. "Salamos güei d'equí con otra fecha pa retomar un procesu políticu similar al anterior y directamente amestáu a él".

Nun contestu de crisis global, col anunciu de llínees d'ayudes que van llegar dende Bruxeles y que se van sumar a les previes destinaes a la transición enerxética, Ángela Vallina, aportunó nuna reivindicación repitida d’IX Asturies pal analís y execución de too lo relativo a los Fondos Europeos."Salamos tamién con una fecha pa convocar a los Grupos Parlamentarios y a la Federación Asturiana de Conceyos. Un oxetivu tien que ser arreyar a los conceyos nel diseñu d'esa estratexa y de los proyectos". Ello ye que la diputada aportunó nel papel clave que tienen de tener los conceyos y la cooperación intermuncipal si, de verdá, quier tenese ésitu. De la mesma, enfatizó, "precisamos una voz fuerte nel Estáu pa consiguir que los criterios que más beneficien a Asturies sían teníos en cuenta n'España y n'Europa. La reconstrucción tien que favorecer a quien yá carecíamos una fuerte crisis económica antes de la crisis sanitaria. Esti ye un capítulu esencial pal futuru d'Asturies qu'algama a la ordenación territorial y a la dixitalización d'Asturies, aspeutos mutuamente rellacionaos y que tanto importen al nuesu mediu rural. Ensin una presencia fuerte y eficaz n'Europa nun va haber un futuru sólidu p'Asturies. Ensin Europa nun va haber solución. Pidímos-y una fecha pal entamu inmediatu d'esti procesu".

Ente los asuntos pindios, pa IX ye indispensable aldericar la reforma de l'Alministración que tien de faese con negociación y pactu, empezando de forma inmediata este mesmu mes, nun modelu compartíu y "co-diseñáu" pol Principáu pero tamién poles Alministraciones Locales.

La Concertación Social, una de los apuestes históricos d'IX, tamién foi unu de los elementos claves nel allugamientu de la formación que pidió qu'esi alcuerdu suscritu ente Axentes Sociales y Gobiernu tien de llegar tamién al Parlamentu. Nun puede haber demorances, alvirtió Vallina, "del alcuerdu social tenemos de dir al alcuerdu presupuestariu de les midíes que más precisen les y los trabayadores, la pequeña y mediana empresa, los autónomos, la hostelería, el comerciu, les y los paraos y toles persones que son más vulnerables al funcionamientu de los mercaos".

Nuna nueva llexislatura na que la correlación de fuerces a favor de la oficialidá, la necesidá de la reforma del Estatutu d'Autonomía pa dotar d'un nuevu marcu xurídicu de la llingua d’Asturies n'igualdá col castellán foi tamién unu de los pidimientos de la vocera d’IX Asturies. "Establezamos güei un calendariu emponedor pa les Reformes del Estatutu. La derecha diz qu'esto ye secundario y la entruga racional ye ¿por qué? ¿torga la reforma estatutaria la consecución de llogros materiales pa la sociedá? ¿Torga avanzar nos asuntos qu'acabamos de mentar? La respuesta ye, evidentemente, non. Nun consume nin recursos nin enerxía política qu'haya de destinase a la realidá socioeconómica. Antes al contrariu, impulsa les polítiques sociales. La derecha asturiana, non asina n'otres partes del estáu, tien un prexuiciu sobro la reforma estatutaria y sobre la oficialidá de la Llingua que nun esiste na sociedá asturiana. La estrema derecha a cencielles odia la pluralidá pos ye la materia primo de la democracia"