Menu

La vocera parlamentaria destaca la importancia d'esti respaldu de tolos axentes sociales y políticos d'Asturies pa llograr un tratu diferencial al texíu industrial asturianu

L'Alianza pola Industria ye yá una realidá. La iniciativa, abanderada dende l'entamu de llexislatura por Izquierda Xunida, afiguróse güei nun documentu nel que roblaron la práctica totalidá de los grupos políticos con presencia na Xunta Xeneral del Principáu, el Gobiernu d'Asturies, y los axentes sociales, representaos polos sindicatos de clase CCOO y UXT, la patronal al traviés de FADE y Cámares de Comerciu y l'Universidá. La vocera d'IX, Ángela Vallina, defendió güei esti gran pactu que se basa, dixo, nun indispensable alcuerdu de mínimos pa defender el sector granible asturianu. “Lo importante ye que'l Presidente d'Asturies vaya, sofitáu tantu por toles fuerces polítiques, como polos axentes sociales, a reclamar al Presidente, de Presidente a Presidente, otru tratamientu para la nuesa industria que, a lo último, ye estratéxica pa tol país”.

Vallina enfatizó'l papel de la so formación pa sacar alantre l'Alianza: “Engarrose dende l'entamu de llexislatura y tamos contentos de que saliera”.

Marxinalidá

A entrugues de la prensa, la vocera d'IX amosó'l so desconciertu pola negativa de Podemos a sumase a l'alianza. “Incomprensiblemente asitióse un poco na marxinalidá, porque uno, cuando tien la fuerza que tien, amás, y n'ares de consensuar, tien que saber arrenunciar a ciertes coses”. La cuestión ye entá más sorprendente, añedió la diputada, por culpa de que, nesta primer mesa, lo que se trató y buscó ye'l consensu pa llantar cara al estatutu de la industria electrointensiva, reclamando un tratamientu específicu.