Menu

Ángela Vallina y Rafael Palacios van trabayar por qu'Asturies ufierte sofitu a la población más vulnerable frente a la toma’l poder de los talibanes

Podemos y IX Asturies van presentar una iniciativa conxunta nel Parlamentu d'Asturies coles mires de favorecer l'acoyimientu de muyeres, neñes y neños afganos, como una midida pa desaniciar los efectos de la crisis humanitaria del país asiáticu, énte la toma’l poder de los talibanes. La vocera d'IX, Ángela Vallina, y el diputáu Rafael Palacios, aprofiaron que ye necesario ufiertar un sofitu que s'inscribiría dientro del compromisu solidariu d'Asturies. El parllamentariu reivindicó que se pongan en marcha “los mecanismos que tengamos, dientro de les posibilidaes que tenga Asturies, nel posible acoyimientu. La situación ye d'estrema gravedá. Dempués de 20 años de guerra tamos nuna situación tarrecible, de vuelta otra vegada, y tamos con esa esmolición".

Ángela Vallina fizo un llamamientu pa siguir el tipu de polítiques que vaiga poner en marcha la Unión Europea empobinada a la población abelugada afgana, coles mires d'abandonar a unos colectivos especialmente vulnerables: "hasta agora, paez qu'el welcome tresformase notra cosa".

Esi acoyimientu tien de priorizase a muyeres, neñes y neños, yá que, denunció Vallina, son grupos de riesgu énte la barbarie talibán. "Ye increíble escuchar al señor Borrell (Altu Representante de Política Esterior de la UE), ayeri, dicir que vamos tener que falar con ellos y vamos axustar con ellos (en referencia a los talibanes) porque ganaron la guerra. La guerra. Bonu, dalgunos ganaron elecciones, como'l señor Maduro, o Chaves, y nun los respetamos". Pa la vocera, ta produciéndose un retrocesu claru que ta suponiendo la meyora d'una política dafechu contraria a los derechos humanos y a la lóxica de la paz, la convivencia y el respetu. Asina, añedió, "ye increíble qu'en plenu sieglu XXI teamos dando estos pasos escontra detrás, pero enforma coles neñes y les muyeres que son pa nós, pa los dos, la gran prioridá".

IX y Podemos van presentar una iniciativa conxunta p'acoyer a muyeres, neñes y neños afganos ante la crisis pola toma’l poder de los talibanes.